Өлеңмен өріліп, әнмен әрленген кездесу

Жуырда Алматы облысының Іле ауданындағы №9 орта мектепте композитор, «Дарын» мемлекеттік жастар сыйлығының лауреаты, Қазақстан Жазушылар одағының мүшесі Бекжан Әшірбаевпен кездесу кеші болды.
Кездесу мектеп директоры Динара Сәкенбай­қызының кеш қонағына ұжымның, оқушылардың атынан алғысын айтып, сый-сияпат жасап тиісті құр­мет көрсетуімен басталып, әуелгіде қалың бұқараға айтыс арқылы аты шыққан ақын Бекжан Әшірбаевтың ілгеріректегі аламандардағы сөз сайыстарынан үзінді көрсетілді. Мұнан соң қазақ поэзиясында өзіндік өрнек салып жүрген ақынның шығармашылығымен жақсы таныс оқушылар оның «Қымыз иісін аңсау», «Естелік бітті кеудеме», «Бақытты іздеу», «Айбергенов атындағы сағы­ныш», «Жанарсыз қыз», «Өмір мен көңіл» және бас­қа өлеңдерін оқыды.
Әлбетте, сахнада өлеңдері өрілген ақын, композитор Бекжан Әшірбаевтың әндері де шыр­қалмай қалған жоқ. Кездесу қонағы болған ән­шілер Қуаныш Құрманбаев «Қарлығашым менің», Жан­дос Әбдірайымов «Жалғыз алма», Шыңғыс Құ­ралбаев «Моншақ қыз», Абай Аймағанбет «Таң-сұлу» және Елдос Мыңжасар «Бақыт жар­на­масы» атты әндерін тарту етіп, кештің көркін қыз­дырды.