«Өр Алтай – асқар Алтай» атты айтыс өтті

Шығыс Қазақстан облысы, Ұлан ауданы, «Молодежный» ауылында «Өр Алтай – асқар Алтай» атты айтыс өтті. Жыр додасына жергілікті ақындар – Нұрболат Абзалханов, Мәжитбан Маркс, ақын әрі термеші Серік Нұрсалтанов, күйші Мырзабек Төкен мен дәстүрлі әнші Арайлым Аплатонова қатысты. Бұл шараны «Аспект-М» әлеуметтік-гуманитарлық зерттеулер орталығы» деп аталатын қоғамдық қор мен Ұлан аудандық Мәдениет басқармасы бірлесе отырып ұйымдастырды. Айтыс мемлекет басшысы Нұрсұлтан Назарбаевтың Қазақстан халқына 2010 жылғы Жолдауындағы негізгі қағидаларды насихаттау мақсатында ұйымдастырылды. Осы мақсатпен қазақтың белгілі ақыны Иран-Ғайыптың авторлық семинары өтті.
Ал 27 тамыз күні Үлбі ауданында облыс тұрғындары арасында «Жыршылардың дастандары мен қиссалары» атты дәстүрлі қазақ халық өнері туындыларының байқауы болды. Байқау Шығыс Қазақстан облыстық Мәдениет басқармасының, жергілікті өнер және зиялы қауым өкілдерінің, «Аспект-М» әлеуметтік-гуманитарлық зерттеулер орталығының» қатысуымен өтті. Бір ерекшелігі, қазақ тарихының дастандары, хикаялары мен жырлары қазіргі күннің өзекті мәселелерімен ұштаса баяндалды. «Достық үйінде» өткен байқауға Шығыс Қазақстан облысының Ұлан, Жарма, Тарбағатай, Зайсан аудандарынан, Өскемен және Семей қалаларынан көпке белгілі өнерпаздар қатысты.