Отбасылық ансамбльдер сынға түсті

Ақтөбе облысы Темір аудандық мәдениет үйінде «Отбасым – Отаным!» атты аймақтық отбасылық ансамбльдерінің байқауы өтті. Отбасы мәртебесін өсіріп, оларға қолдау көрсетуге, халқымыздың дәстүрлі өнерін дамытуға бағытталған байқауға тек облыс аудандарынан ғана емес,  сонау Маңғыстау облысы Бейнеу ауданынан арнайы ат сабылтып «Божановтар» мен «Еламановтар» ансамблі, Атырау облысынан «Қарабалиндер» мен «Сұлтанмұратовтар» келді.
Жалпы, отбасылық ансамбльдер бай­қауы Темір ауданында осымен екінші рет өтіп отыр екен. «Оны ұйымдастырып, өт­кізу­­дің  өзіндік себебі бар» дейді ұйымдас­тыру­­шылар. Облыс көлемінде бар тоғыз отба­сы­лық, халықтық ансамбльдің үшеуі осы Темір ауданынан екен. Сонымен қатар бұл от­басылық ансамбльдер облыс дең­ге­йін­дегі үлкен іс-шараларға белсене ара­ласып та жүр. Және тұрғындар арасында жо­ғары беделге де ие. «Отбасылық ұжым­дарға қолдау көрсету және шығармашылық сала­сындағы жетістіктерін көпшілікке, атап айтқанда, республика халқына дәріптеудің маңызы зор», – дейді  аудандық мәдениет үйі­­нің басшысы. Сондықтан да  алдағы уа­қыттарда  «Отбасым – Отаным!» атты ай­­­мақтық отбасылық ансамбльдер бай­қауы өз жалғасын табатын болады деп сендірді.
Гүлзира ҚАЛИЕВА, Темір аудандық мәдениет үйінің директоры:
– Байқауды өнердің қыр-сырын жетік түсінетін кәсіби мамандар бағалады. Атырау облысы Құрманғазы ауданынан келген Сұлтанмұратовтар отбасы байқау талаптарынан сүрінбей өтіп, бас жүлдеге қол жеткізді. Бірінші орынды Темір ауданы Қопа селолық округінен келген Бай­дышев­тар халықтық отбасылық ансамблі иеленді. Екінші орынды мұғалжарлық Тәттіғұловтар отбасынан құралған «Назар» тобы мен маңғыстаулық Еламановтар отбасы иеленсе, жүлделі үшінші орынға ансамбль­ге «Сазды әуен» деп ат берген мәртөктік Күзенбаевтар және Байғанин ауданындағы «Ақниет» отбасылық халықтық ансамблі ие болды. Жүлдегерлердің барлығы ар­найы дипломдар және бағалы сыйлықтар­мен марапатталды.