"Қатын болуға" құмар әртістерді жақтаған Уәлибектің өзі сынға қалды
Осы сыннан соң "Шаншар"театрының директоры Уәлибек Әбдірайымов та өз уәжін алға тартты.
«Әртіс ол өз өмірін ойнамайды. Осы нәрсені түсіну керек. Ерлер арасында да сахнаға шығып, әйел рөлін сомдаймын деп өз-өзін мазақ қылғандар бар. Сол себептен сынаған уақытта, жалпылама айтпай, шеберлігіне мән берсек. Ал ер адамның барлығы әйел болып ойнауды тоқтатыңдар деп айтуға болмайды. Ол жанрдың заңында жоқ нәрсе», - деді Уәлибек өзіне қарата айтылған сынға.
Осыдан кейін, әлеуметтік желіде Уәлибектің бұл әрекетін ұят санайтын оқырмандар да көбейді.
«Анасын, әжесін мазақтап, тиын тапқанына қуанады...», «Ол еркектің шамасы әйелге ғана жеткеннің көрінісі. Қолдарынан келсе, депутат мен шенеуніктерді нысанаға алмай ма?» - дейді ғаламтор қолданушылары.
Араларында әртістердің еркек екеніне күмәнмен қарайтындары да табылды.
«Сол қатын болып ойнап жүргендердің еркектігіне күмәнім бар. Үйінде қатыны еркек ролінде ойнайтын шығар», - деп жазған қолданушылардың бірі.
"Теледидарды бұрап қалсам, жаңағы "Шаншардың" көрінісі болып жатыр. Бір кемпір сөйлеп тұр, оның өзі еркек. Байқайсыздар ма, біздің қазақтың жігіттері қатын болуға әуес болып алды қазір", - деп сөккен еді Зейнеп Ахметова.
"Іштерінде бірдеңе түрткілеп тұрады. Солардың бар ғой бір бәлесі бар. Әйтпесе дардай ер азаматтар неменеге сонша әйел болуға тырысады? Дүниенің бәрін білетін "Шаншардың" директоры Уәлибек соған келгенде неге білмей қалды?", - деп кесіп айтып еді Бауыржан Момышұлының келіні.
