«Қазақстан» «Қасымның» тұсауын кеседі

Сүйінші! Ұлы Отан соғысының ардагері, Қазақстанның Халық Қаһарманы, жазушы Қасым Қайсеновтің отты жылдардағы өр тұлғасын паш ететін көркем фильм көрермен назарына тартылмақ. Кеше «Қасым» атты осы фильмді түсіруге атсалысқан топ сериалды көпшілікке таныстырып, баспасөз мәслихатын өткізді. Төрт бөлімнен тұратын туындыны «Қазақстан» РТРК, КТК, «Еуразия» бірінші арнасы мен ресейлік INTRA Communication және украиналық FILM UA бірлесіп түсірген.
Фильм атауы айтып тұрғандай, Екінші дүниежүзілік соғыста атақты барлаушы бол­ған қазақтың батыр ұлы Қасым Қайсе­новтің біртуар болмысы жайында. «Таны­мал ресейлік режиссер Леонид Белозо­ро­вич пен сценарий авторы, белорус Ан­дрей Курейчик кино желісіне заманауи кине­матография арсеналы – психология­лық қайшылықтар, жойқын шайқас пен ли­ри­калық көріністер арқылы ерекше реңк берді», – дейді ұйымдастырушылар.
Аталған фильмнің түсіру идеясының авторы, КТК телеарнасының бас дирек­торы Арман Шораев: «Сіздердің алдары­ңызда әртүрлі телеарнаның басшылары отыр. Иә, біз өз ішімізде бәсекелестерміз. Алайда елдігімізді, ұлттық батырлары­мыз­ды көрсететін кезде бір жағадан бас, бір жеңнен қол шығаруға дайынбыз. Ең бастысы, біз соғыс кезіндегі қазақ батыры­ның ерлігін көрсете білдік. Негізі, Ұлы Отан соғысында қаза тапқан ұлттардың саны жағынан қазақтар төртінші орында тұр ғой. Біз Ұлы Жеңіске үлкен үлес қостық. Түр­кі халықтарының ішінде Әлия мен Мән­шүк Кеңес Одағының Батыры атағына ие болды. Оның өзі қазақ халқының өшпес рухын көрсетсе керек. Мен өзім ресейлік сериалдарды көрген кезде, өзбек, қырғыз, тіпті буряттарды жиі байқаймын. Ал қазақ туралы ештеңе айтылмайды. Сондықтан осы «Қасым» атты фильмді түсіру арқылы біз тарихи әділдікті орнатып отырмыз», – деп атап өтті.
Сергей КИСЕЛЕВ, «Еуразия» бірінші арнасының директоры:
– Біз о баста жоғары стандартты, сапалы дүние жасауды ойластырдық. Қазақстан, Ресей, Украина араласып түсірген сериал аталған елдермен қа­тар, Беларусь және Қытай көрерменде­рін де қамтитын болады.
Ілияс ЫСҚАҚОВ, «Қазақстан» ұлттық арнасының директоры:
– Ұлттық арнаның былтырдан бас­тап сериалдар түсіріп, көрерменге өзі­нің ғана өнімін ұсынып жатқанын жақ­сы білесіздер. Біздің алдағы уақытқа да үлкен-үлкен жоспарларымыз бар. «Қа­сым» – шығынын бір ғана телеарна көте­ре алатын сериал емес. Өте сапалы фильм шықсын деп шетелдік киноком­па­ниялармен де байланыс орнатқа­ны­м­ыз сондықтан.
Олай дейтін жөні бар. Сериалдың бюд­жетін сұрағанымызда құпия ретінде сақ­тап, көпшілікке айтылмады. Бас-аяғы 60 күнде түсірілген Қайсеновтің ерліктерін паш ететін фильмде батыр Қасымның рөлін белгілі актер Қуандық Қыстықбаев сомдаған. Баспасөз мәслихатын ұйым­дастырушылар Қ.Қуанышбаев атындағы Мемлекеттік академиялық қазақ музыка­лық драма театры актерінің басты рөлге бірден бекігенін жеткізді. Ресейлік режис­сер Ермек Тұрсыновтың «Келін» картина­сы­нан бері ұнатып жүргенін айтып, Қ.Қыс­тық­баевты кастингісіз таңдаған екен.
Фильмді таныстырушылардың ара­сын­да Қасым Қайсеновтың немересі Ақ­бо­та Мұратқызы да болды. Сериалды от­басымен бірге көріп үлгергенін жеткізген А.Қайсенова: «Атамыздың айтып отыра­тын соғыстағы достарының ерліктері, ба­сы­нан кешкендері туралы жақсы білеміз. Фильмнен осының бәрін көрдік. Өте сапалы шыққан деп айтуға болады. Бүкіл әулетіміздің атынан барлықтарыңызға ал­ғыс айтқым келеді», – деді.
Естеріңізге сала кетейік, «Қасым» 7-10 мамыр аралығында «Қазақстан» ұлттық арнасынан 19:30-да көрсетіледі. Ал 9 ма­мыр күні орыс тілінде «Еуразия» ұсынады. Сериалды КТК телеарнасы 22 маусым, яғни фашистік Германияның КСРО-ға ша­буыл жасаған күніне орай қайталайтын болады.