Қазақстандық 19 жастағы стартапер америкалық Forbes журналында «Өзгеріс жаршысы» атанды
19 жастағы қазақстандық стартапер Forbes журналының арнайы шығарылымында «Өзгеріс жаршысы» атанды, деп хабарлайды Media Change.
Тимур Рыспеков – AbsCrypt-құрылғыдағы барлық ақпаратты қорғайтын криптографиялық жүйенің негізін қалаушы. Бағдарлама Windows, MacOS, Linux, iOS, Android барлық негізгі платформаларында жұмыс істейді.
Бағдарлама бойынша жұмыс екі жыл бұрын басталған. Ал 2019 жылы жобаның коммерциялық нұсқасы шығарылды. Бағдарлама IT нарығында сынақтан өтті.
«Бағдарлама дайын болған кезде біз оны Bugcrowd платформасында сынап көруді шештік. Visa немесе Mastercard сияқты көптеген компаниялар өз жүйелерінің сенімділігін тексергісі келгенде өз еріктерімен осы процедурадан өтеді. Сондай-ақ, біз AbsCrypt бағдарламасын бұзуға конкурс жарияладық.
Егер біреу біздің файлдардың ең болмаса біреуін бұзса, олар 100 мың доллар алады. Біз шынымен де криптография саласындағы үздік мамандарды тартқымыз келді. Тестілеуге АҚШ, Ресей, Еуропа және Қытайдан келген криптография мамандары мен хакерлер қатысты. Бірақ, бір файлды ешкім бұза алмады.
Соңында қатысушылар бағдарламаға кіру үшін біздің жеке электрондық пошталарымызды бұзуға тырысты. Сонда да еш нәтиже болмады», - дейді AbsCrypt негізін қалаушы Рыспеков.
Тимурдың жобасы 2020 жылдың ақпан айында «Жылдың сапалы инновациясы» халықаралық байқауында жеңімпаз атанды. Бағдарлама Қытай, Испания, Финляндия, Ресей жобаларын айналып өткен ең жақсы жаһандық инновациялардың бірі деп танылған.
Өнімнің жалпы құны – 20 мың доллардан 150 мың долларға дейін. AbsCrypt инвестициясының жалпы сомасы 1,2 миллион долларды құрайды. Қазір инвесторлар компанияны 10 миллион долларға бағалап отыр.
Тимур 17 жасында сыныптастарымен бірге NASA ғарыш агенттігінің жас инноваторлары байқауында жеңіске жеткен. Сонымен қатар, ол ҚР Ұлттық инженерлік академиясының «2019 жылдың үздік инженері» атағына ие болған. Алғашқы стартапын 7 сыныпта бастаған Тимур «Қазақстанның жүз жаңа есімі» тізіміне енген.
2017 жылы Тимур Алматыға оралып, М. Маметова атындағы №28 орта мектепті сырттай бітірді. Осылайша, оның оқу аяқтағаны туралы екі сертификаты бар: Канада және Қазақстан.
Қазір жас кәсіпкер Массачусетс технологиялық институтында (MIT) информатика мамандығы бойынша қашықтан оқиды.
