Қазақтың Қалиласы 55-те

«Тәушен», «Міржақыптың оралуы», «Нәубет», «Мағжан», «Кісен ашқан», «Алашорда» секілді қазақтың бағы мен соры дерлік жайларды тізіп, бас-аяғы 30 шақты деректі фильм түсірген режиссер Қалила Омаров биыл 55 жасқа келді. Ал оның шығармашылық ғұмырына – 30 жыл!

Осыған орай, күні ертең сағат 14.30-да Қазақстан Жазушылар одағының Әдебиет­шілер үйінде кинодокументалист Қалила Омаровтың «Нәубет» пен «Мағжан» атты туындыларының көрсетілімі болады. Атап айтарлығы, биыл тарихи датаға толы жыл: 1932 жылғы аштыққа 80 жыл толса, 1937 жылғы репрессиядан бері де 75 қыс еріп, соншалық көктем келіпті. Қалила Омаров­тың «Нәубет» пен «Мағжаны» – қазақтың басындағы осындай қаралы күндерге ар­на­лып түсірілген туындылар. Олар да өздері тиек еткен тақырып секілді кезінде талай теперіш көріп, енді бүгін ғана қайта тіріліп, көрерменге оралды десе болған­дай.
«Атадан ұл туса игі, ата жолын қуса игі» дегендей, режиссердің ұлдары да өзінің жолын қуып, бүгінде деректі фильм жолы­на түскен. Тіпті Қуаныш атты ұлы әкесінің өмірі мен шығармашылығы жайлы «Фор­точкадан қонған бақ» атты туындыны түсір­ді, осы кеште соның тұсауы кесілмек.