Қырғыз әуені этникалық музыка фестиваліне сән береді

The Spirit of Tengri фестиваліне қатысушылармен таныстыруды жалғастырамыз. Бізде қонақта – қырғызстандық әнші Gulzada. Ол жобаға «Жаз» және «Толғону» атты екі композициясын ұсынып отыр.

Гүлзада Рысқұлова – «Ордо-Сахна» фоль­клор­лық-эт­но­гра­фия­лық тобының солисі. Кә­сіби шы­ғар­ма­шы­лы­ғына 10 жылдай уақыт болған орын­дау­шы ән­де­рінің біразын өзі жазған. Ош мем­лекеттік пе­дагогикалық музыкалық инс­ти­тутының түлегі қо­мыз, баян аспаптарында шебер ой­найды. Қырғыз жұрты Gulzada-ны эпос үлгілерін тұң­ғыш рет қазіргі заманғы музыкамен орындаған ән­ші ретінде таниды. «Мен ең алғаш «Құрманбек» эпо­сын этно-рок жанрында орындағанда көпшілік наразылық білдірді. Өйткені бұған дейін батырлық жырларды ешкім жаңа заманға бейімдемеген еді. Бірақ көп ұзамай «эпосты қомызбен ғана орындау керек» деп сын айтқандардың өзі «Манастың» үзінділерін қазіргі заманғы ырғақтарға көшіре бастады, солай орындау сәнге айналды. Меніңше, этникалық музыка тыңдармандарын көбейту үшін оны заманауи жанрлармен байланыстыруы керек», – дейді әнші. Қазір The Spirit of Tengri фестивалінің СТВ телеарнасындағы және Tengri FM радио­сындағы эфирлерінен Gulzada-ның екі әні беріліп жатыр. Әншінің шағын сұхбатын газетіміздің ал­ғаш­қы нөмірлерінен оқи аласыздар. Ал фестиваль қатысушыларының композициялары туралы мәліметті Facebook-тегі The Spirit of Tengri бетінен алуға болады.
Гүлзада, Қырғызстанның этноэстрада әншісі:
– The Spirit of Tengri фестивалінің маңызы ора­сан. Түркітілдес халықтар дүниежүзін онсыз да таны­мал болған шетелдік поп-музыкамен, эстра­дамен таңғалдыра алмайды. Әлемді этникалық-фоль­клорлық шығармалар қызықтырады, олар үшін аспаптарымыз бен жырларымыз – тың дүние. Көне музыкалық мұрамызды жаңа заманға бейім­деп ұсынсақ, оны көпшілік қолдайды әрі мәңгіге сақ­талады. Осы ретте біздің құрлықта тұңғыш рет қолға алынған The Spirit of Tengri ауқымды жобасы – оң бағытта. Жоба фольклормен шектеліп отырған жоқ, ол архаикалық музыкаларға да терең барып отыр.