Сайғақтар туралы айғақ

Таяуда Алматыдағы «Меломан» дүкендер желісінде қазақ тіліндегі қазақ мультфильмдерінің DVD жинағы шықты. Отандық анимацияның сәл де болса мұндай жетістікке жетуіне мұрындық болғандар – Seimar Social Fund, Шымкент қаласындағы «Анимастер» студиясы, «Меломан home video» ЖШС.
Төл мультфильмдеріміз жинақталған диск алғаш рет жарық көріп отыр. Бұ­ған дейін жергілікті бейнеөндіріс «Көш­пенділер», «Моңғол» секілді бірді-екілі көркем фильмдердің дүкендер­дегі аз-маз данасына қанағат етіп келген болатын. Ал аталған дискіге анимациялық фильмдердің көрермендері үшін «Алдар Көсе», «Сайғақ туралы аңыз», «Сайғақ туралы аңыз-2» деген мультфильмдер енгізілген. Бұл мультфильмдердің режиссері – Мақсұт Жарымбетов, сценарий авторы – Татьяна Жарымбетова. Мамандардың айтуынша, бұл анимациялық туындылардан нағыз қазақы реңк байқалады әрі тәрбиелік мәні күшті. Аталған мультфильмді тамашалаған бала тек түрлі-түсті әдемі суреттерге қызығып қана қоймай, одан өзіне өмірлік рухани азық алары хақ. Айталық, «Алдар Көсе» мультфильмінің мазмұны ауыз әде­биетінен тамыр алып, негізгі желісі қазақтың аты аңызға айналған ертегі, аңыз-әңгіме кейіпкерінің басынан өткен түрлі қызықты оқиғаларына құрылған. Ал 2006 жылы теледидардан көрсетілген «Сайғақ туралы аңыз» мультфильмін көпшілік жылы қабылдап, ол көптеген жүлделерге ие болған. Сондай-ақ «Сайғақ туралы аңыз-2» жобасы алдыңғы аңыздың жалғасы іспетті болды.
Бұл жоба Seimar Social Fund және ҚР Орман және аңшылық комитетінің, сондай-ақ Қоршаған ортаны қорғау одағының «SOS-сайғақ» деп аталатын кең көлемді бағдарламасының аясында 2005 жылы қолға алынған еді. Аталмыш бағдарламаның мақсаты – Қазақстан территориясында құрып бара жатқан сайғақ популяциясын қал­пына кетіру және сақтау болатын. Егер 2005 жылы Қазақстандағы сайғақтың популяциясы 39 600 болса, 2008 жылы бұл көрсеткіш 61 мыңға көбейген. Сон­дық­тан да сайғақ туралы түсірілген мульт­фильмнің екі бөлімі де маңызды мәселені балаларға икемделген жатық тілмен түсіндіруге тырысып, жас буынның табиғатқа, қорша­ған ортаға, отанға деген сүйіспен­шіліктерін арттыруды мақсат етеді.
Сатылған дискілер тек отандық муль­типликация өндірісін көтеру мақсатында ғана емес, қайырымдылықты да көздейтін көрінеді. Диск саудасынан түскен қар­жы Komanda SOS деп аталатын коррди­на­циялық волонтерлер жобасын іске асы­руға жұмсалмақ.