Студенттер Ресейге барып концерт қойды
Тәуелсіздігіміздің 20 жылдығының аясында екі ел арасындағы қарым-қатынасты нығайтып, ұлттық музыка өнерін, елу жылдан астам тарихы бар оқу орнын насихаттау мақсатында жақында Дина Нұрпейісова атындағы Халықтық музыка академиясы – Атырау музыка колледжі Ресей елінің Астрахань қаласында «Қазақстан – қасиетті Отаным» атты есептік концертін өткізіп келді.
Астрахань мемлекеттік филармониясының концерт залында өткен сазды думанда колледж студенттерінен құралған ұлт-аспаптар ансамблі, «Достық» вокалды ұлдар ансамблі, хор ұжымы, концертмейстерлер Қ.Шакиева, Е.Сүлеевалар, Е.Мерекенов, Б.Бисенбаева, А.Әпенова, Г.Жұматаева, С.Әлібеков, Ж.Жамиев секілді әнші-домбырашылар өнерлерін көрсетті. Облыстық әкімдіктен бөлінген төрт автобуспен көршілес мемлекетке барып, концерт қойып келген өнерпаздар астраханьдықтардың өздерін өте жылы қабылдағандарын айтады. Колледж директоры, өнертану ғылымының кандидаты Гүлнара Сәдуақасовадан білгеніміздей, концерт барысында Астрахань аймақтық «Жолдастық» қазақ мәдени ұйымының төрағасы А.Жаркенов, Құрманғазы атындағы аймақтық мәдени орталығының директоры Н.Медетовтер сөз алып, алғысхаттар мен ескерткіш сыйлықтар табыс етіпті. «Бұл – өнерлі жастардың ел Тәуелсіздігіне тартуы», – дейді колледж басшысы.
