Шынайы күлкінің «Шаншары» Жаңаөзенде

Өткен демалыс күндерін жаңаөзендіктер көтеріңкі көңіл күймен қарсы алды.  Түлеген түбектің бір пұшпағы - Жаңаөзен қаласына алыстан ат арытып «Шаншар» әзіл-сықақ театры келді. Қазір не көп, КВН, сатира театрлары көп. Алайда «Шаншардың» орны бөлек. Осыдан бір жыл бұрын бұл театр мұнайшылар қаласында өнер көрсеткен болатын.
Сондықтан ба, түбек тұрғындарының «Шаншар» десе шығарға жаны бөлек, әртістерін алабөтен жақсы көреді. Бұл жолы да Уәкең-Уәлибек Әбдірайымов бас­таған он шақты адамнан құралған өнер­паз­дар мұнайлы қала тұрғындарын екі күн бойы күлкіге кенелтті. Залдан орын тиме­ген­дер, күлкі серілерінің өнерін табан­дарынан тік тұрып тамашалады.
Бізге сахна сыртында «Шаншар» әзіл-сықақ тетатрының директоры Уәлибек Әбдірайымовпен аз-кем тілдесудің сәті түсті.
– Қазақ «сабақты ине сәтімен» дейді ғой, сәті түсіп Жаңаөзен қаласына келіп қалдық. Тұңғыш Елбасы күні, одан ары Тәуелсіздік мерекесі, Жаңа жыл дегендей, осындай жақсы мерекелер топтасқан соң, «ҚазМұнайГаз» Барлау. Өндіру» АҚ және «Өзенмұнайгаз» АҚ бізге демеушілік жа­сап, осында шақырды. Қал-қадеріміз кел­ген­ше көрерменге көтеріңкі көңіл күй сый­лап, шымшыма әзіл мен әдемі әндерімізді тарту етудеміз. Әрдайым ел тыныш, жұрт аман болсын, мерекелер көбейе берсін, – дейді У.Әбдірайымов.
Біз «Өзенмұнайгаз» АҚ бас директоры Мақсат Ибағаровты да сөзге тарттық.
– «ҚазМұнайГаз» Барлау. Өндіру» АҚ және «Өзенмұнайгаз» АҚ-тың демеушілік қолдау жасап жатқан шаралары бір бұл емес, биыл Жаңаөзен қаласына 45 жыл то­лып отыр, осы мерейтойдың аясында қа­ла­лық әкімшілікпен қанаттасып, мұнай­шылар да біраз шаралар атқаруда. Жел­тоқсан айының 6-сынан бастап Алматыда­ғы М.Әуезов атында драма театры бізде бір апта бойы гастрольдік сапармен бола­ды. Одан соң Астанадағы өнер акаде­мия­сы­ның маңғыстаулық өнерпаздары келіп, қа­ла халқын классикалық өнер туын­ды­ла­рын шырқамақ. Бұл шаралардың бар­лы­ғын тұрғындар тегін тамашалайды, – дейді М.Ибағаров.
Сондай-ақ кеш барысында Жаңаөзен қаласы әкімнің орынбасары Исахан Са­ғы­н­баев сахнаға көтеріліп, шаншарлықтарға көрермен атынан алғысын жеткізді.
– Өнер ұжымына тек шығармашылық табыстар тілейміз. Осындай ұжымның өлкемізге келіп, көрерменге әдемі кеш сыйлаған мұнайшыларға тұрғындар атынан ризашылығымызды білдіреміз. Тек қана қаламызда тыныштық болып, мереке жалғасын таба берсін. Өнер мерекесі әр отбасына қуаныш сыйласын дегіміз келеді, – деді өз сөзінде И.Сағынбаев.
Жаңаөзендік көрермен шаншарлықтар­дың өнеріне дән риза. Арасында әнмен тұздықталған сахналық қойылымдардан біреулер өздерін көріп күлкіге кенелсе, біреулер таныс-тамырларын танып таңға­лып жатты.
– Қаламызға «Шаншар» театры келіп жатыр, өте қуаныштымыз. Шетте жатқан елміз ғой, орталықтан осындай мәдени-әде­би шаралар көп болса екен деп тілей­міз. Бала-шағамызбен келіп тамашалап жатырмыз, «Өзенмұнайгазға» рахмет, ха­лық­ты тегін кіргізіп жатыр, Елбасы күні, алдағы Тәуелсіздік мерекесі құтты бол­сын, – дейді Жаңаөзен қаласының тұрғыны Нұрбала Демегенова.
«Шаншарлықтар» қоғам дертіне ай­нал­ған барлық келеңсіздіктерді бір-бір түй­­реп өтіп, жұртты күлдіре отырып ой­лантты. Жұрт өнерлерін теледидардан ғана тамашалап, Астана, Алматы халқы кіруге билет таппай жүргенде мұнайлы қаланың көпбалалы және аз қамтылған отбасылары нағыз саф өнердің қайнары­нан осылайша тегін сусындауда.
– «Өзенмұнайгазға» рахмет, қаламыз­дың 45 жылдығына Тұңғыш Елбасы күніне арнап осындай шараларды тегін ұйымдас­ты­рып жатыр. Халқымыздың жағдайы жақ­сы, әртістеріміз де аянбай өнерлерін көр­сетіп жатыр, алғыстан басқа айтарымыз жоқ, – дейді Жаңаөзен қаласының тұрғыны Сан­сызбай Ашықов.