Шыңғыс хан ұрпақтары түгенделуде

Алматыдағы «Меломан» сауда орталығында Дүниежүзілік Шыңғысхан академиясының академигі Ғизат Табылдиннің «XIII-ХХІ ғасырлар аралығындағы Шыңғыс ұрпақтарының генеалогиясы» («Всемирная генеалогия Чингизидов с 13 по 21 вв.») атты кітабының тұсаукесері өтті.
Бұл – соңғы уақыттарда әлемдік тарихта ай­рықша орны бар тұлға туралы жазылған тың еңбектердің бірі. Ғылыми-танымдық ізденіске негізінен әлемнің түкпір-түк­пі­рін­де шашырап қалған Шыңғыс хан ұр­пақ­тарының генеалогиясы арқау болған.
Шыңғыс хан сынды ұлы қолбасшының қазіргі күнге дейінгі ұрпақтарының ше­жі­ресі түзілген бұл еңбектің айтары мол, де­рек­көздері де сенімді. Автор ұзақ жылдар бойы әр жерден Шыңғыс хан ұрпақтары туралы мәліметтер жинап, ол мәліметтерді жүйелі кестеге түсірген. Кітапта сондай-ақ белгілі шығыстанушы ғалымдардың, моң­ғол тарихын зерттеушілердің еңбектері мен Еуропа, араб, парсы, қытай мұ­ра­ғат­тарынан алынған материалдар пай­да­ла­ныл­ған.
Ғизат Табылдин, кітап авторы:
– Мені қызықтырғаны – осындай ұлы тұлғаның ұрпақтары ғұмырнамасы болды. Бұл менің 10 жылдан аса уақыттан бергі зерттеуімнің жемісі, алғашқы үлкен еңбегімнің жалғасы.
Мен әрбір деректің ғылыми негіз­демесін беруге тырыстым. Шыңғыс ұр­пақ­тарының ДНК зерттеулерімен АҚШ ғалымдары айналысты. Алдағы уақытта да бұл еңбектерім тың деректермен толығады деген үмітім бар.
Жаңа жинақ бұған дейін жарық көрген ғалымның «Шыңғыс хан ұрпақтары – әулеттер және дәуірлер» атты үлкен кітап­тың заңды жалғасы. Шыңғыс хан тақырыбы  күрделі болғандықтан, ол жүйелі де нақты зерттеулерді қажет етеді. Қаһарман қолбасшы жайында жазылған ғылыми, көр­кем кітаптар аз емес. Десек те, бұл еңбек шыңғысхантанушы тарихшы ғалым­дар мен жас ізденушілердің болашақтағы та­лай еңбектеріне арқау болары сөзсіз.