Талапбек тұлғасын танытар жинақ
Ел руханиятын көтеріп, мемлекеттің дамуына елеулі үлес қосқан қайраткерлердің бірі – Талапбек Сұлтанбекұлы. 
Әкесі Алаш ардақтыларының бірі Сұлтанбек Берсүгіровтен ерте айырылған, сөйте тұра қиындық-зұлматқа мойымаған Талапбектің өзі айтулы тұлғаларды тәрбиелеп шығарған ұлағатты ұстаз екендігін ескерсек, жақсының жарығы жыраққа жеткендігін пайымдаймыз.
Т.Сұлтанбекұлының «Білім және еңбек» журналына басшылық жасап тұрған уақытында ақтаңдақтар ақиқатына бойлауы – ерекше назар аудартады. Оның еліміздегі ғылыми фантастиканы дамытып, оған ұлттық келбет дарытуын елемей жатсақ, қиянат болар еді.
Белгілі мемлекет және қоғам қайраткері, журналист, жазушы Талапбек Сұлтанбекұлының ел тарихындағы елеулі тұлға екендігі анық. Басқасын былай қойғанда, ол кісінің шәкірттерінің қатарында Елбасы Нұрсұлтан Назарбаевтай тұлғаның кездесуі де кездейсоқтық болмас.
Өткен жылы бақи бесігіне аттанған осынау ұлы ұстаз турасында таяуда оның еңбектері топтастырылған «Талапбек Сұлтанбекұлы. Ұстаз. Қаламгер. Қайраткер» деп аталатын жинақ жарық көрді. «Қағанат» баспасынан шыққан бұл кітапқа Т.Сұлтанбекұлының әр жылдары жазылған көркем шығармалары, зерттеу еңбектері және сұхбаттары қамтылып отыр. Сондай-ақ осы кітапта қайраткердің жеке мұрағатындағы кейбір қолжазбалар да қоса жарық көрген жайы бар. Кітапта сонымен қатар Т. Сұлтанбекұлының ғылыми-көпшілік салаға қатысты әдістемелік ұсыныстары мен ол турасындағы замандастары, шәкірттері және туыстарының естеліктері енгізіліп отыр.
Алдияр Сұлтанбеков пен Шоқан Сапаралы құрастырған бұл жинақтың жауапты шығарушысы – Т. Сұлтанбекұлының зайыбы, аудармашы-тілші, өлкетанушы Жамал Қасенқызы.
