Таңғажайып планета таңғалдырды

Қарашаның 16-сы күні Астана қаласы әкімдігінің Қ. Қуанышбаев атын­да­ғы Қазақ мемлекеттік академиялық музыкалық драма театрында жазушы, дра­матург Қуаныш Жиенбайдың «Таңғажайып планета» фантасмагориясы  бол­ды.
Режиссері – ҚР еңбек сіңірген қай­рат­кері Болат Ұзақов. Жетінші қойылымға дейін премьера болып есептелетінін ескер­сек, жұртшылық алдында туындының тағы бір мәрте тұсауы кесілді дей аламыз.
Қуаныш ЖИЕНБАЙ, автор:
– Астана әлемге танылды. Осы бір жат­танды тіркесті тым көп айтамыз. Біз әлі күн­ге сұлу қаланың сыртқы сұлулығына там­сану­мен келеміз. Мақұл, солай-ақ болсын, бірақ Астана тек көз тоймас көр­кі­мен ғана емес, адамдарымен де эталон болуы тиіс қой? Шығарма Астана туралы болғанымен, Астана жайында бірде-бір сөз қозғалмай­ды.  Жаңа планетада өмір сүретін адамдар­дың жаңа қауымдастығы қатарына ілігуге кім лайық, әңгіме, міне, сол хақында...  Аңыз секілді, бірақ ақиқат.
Расында, бір қарағанда ғана Астана секіл­ді көрінгенімен, «жаңа планета» кө­рерменді одан әлдеқайда терең ойға же­те­лейді. Тал бойында тозаңның түйіріндей міні бар адамды өткізбейтін «кеден» – та­ра­зы.  Яғни «шаң басқан ғаламшар жұртын шайып алса ғой, шіркін!» деген автордың ар­маны тіпті сонау ертедегі Асанқайғы бабамыздың желмаяға мініп, «Жерұйық» іздеп шарқ ұрғанын елестеткендей...