Төртқұдықта азан үні асқақтамақ
Мешіт – Алланың жердегі үйі. Хадистердің бірінде кімде-кім мешіт салса, оның сауабы Меккеге барғанмен бірдей екендігі айтылған. 
Құдайға шүкір, бүгінде арамызда жиған қаржысымен қара басының қамын ғана күйттемей, мешіт салып, имандылық өнегесін көпке үлгі етіп жүрген азаматтар баршылық. Сондай азаматтың бірі – Төртқұдық кен-байыту комбинатының президенті Әмірхан Магометұлы жақын күндері аузында Алласы бар жамағатқа тамаша мешітті сыйға тартты. Қызыл түсті әдемі кірпіштен өріліп, күміс күмбезі жарқыраған ай маңдай орданы салуға мамандар Ресейден шақырылып, құрылысқа 5-6 млн теңге шамасында қаржы жұмсалыпты. Заманауи үлгідегі мешіт өзінің жаңалығымен ғана емес, ішкі әрінің ерекшелігімен де көз тартады.
Мешіттің ашылу салтанатында Павлодар облысының әкімі Бақытжан Сағынтаев, Екібастұз қалалық мешітінің бас имамы Әбілхан қажы Балтаұлы мұсылман қауымды осынау тамаша оқиғамен құттықтап, Төртқұдық жұртына ақ тілектерін ақтарды. Салтанатты рәсімнен соң аруақтарға бағышталып, құран оқылды.
