...Түбі кеп күллі қазақ айта жүрер Біздің де соңымызда бір іс қалар!

Қазақ әдебиеті тағы бір қабырғалы қаламге­рі­нен айырылды. 10 желтоқсан күні 75 жас­қа қараған шағында ұлт әдебиетінің белді өкіл­де­рінің бірі, Халықаралық «Алаш» әдеби сыйлығының лауреаты, көрнекті ақын Сәкен ИМАНАСОВ ауыр науқастан көз жұмды.

Ел басына күн туған ала­сапыран уақытта дү­ние­ге келіп, бойындағы Алла берген талантын ең­бек­пен ұштастыра білген ақын, әде­биетке өткен ға­сыр­дың 60-жыл­дары дүркіреп кел­ген тегеурінді де тал­ғам­ды буын­ның ойы таза, сөзі түзу бір мүшесі бола білді. Кеше­гі Қасым, То­қаш, Мұқаға­ли, Жұмекен, Төле­ген, Төлеу­жан­дардың ізін ала келген қазақтың Қадыры мен Тұ­ман­бай­ла­рының қаламдас, қанат­тас, сырласы болған Сәкең төл әдебиетімізге таза да адал тер төгіп, ұлт рухания­тының көркейе түсуіне барынша қызмет етті. Ақынның әсіресе балалар әдебиетіне сіңірген еңбегі орасан. Кішкентай оқыр­манның санасына лайық, «жүрегіне жылы, тіліне жеңіл» бо­лып келетін ақынның бала­ларға арнап жазған өрнекті өлең­дері бірнеше кітапқа арқау болып, орта мектеп оқулықтары мен арнайы танымдық жинақтарға да енгізілген. Қашанда ел жайлы толғанып, елдің руханиятына алаңдап жүретін ақын, баспасөз беттерінде де ақындық, азаматтық ойларын ортаға салып, үнемі қоғамдық пікірге өткір үнін қосып жүретін. Жылдар жылжыған сайын қаламдас достарының қатары сирей бастаған ақын, соңғы кездері жиын-тойлар, алқа-қотан отырыстар мен дүрмек­тер­ден бойын аулақтап, басылым беттерінен де жиі көріне бермеді. Ақынның тірісінде оның жүрек түкпірінде сақтаған нендей ой, нендей құпия жатқанын айналасы ұғынып-түйсіне бермесі аян еді. Өлеңді өмірім деп ұққан қаламгердің кітап­тарын ақтарып отырып мына бір өлең жолдарына көзіміз түсті:

Атымыз қырда қалар, жырда қалар,
Қалың ел түбі келіп бір бағалар.
Алдында ақтарды деп барымызды,
Алдымен зарымызды тыңдап алар.
 
Алатын әр сөзіңді мыңға балап,
Біздің ел бар деуші еді жырда қанат,
... Ендігі мұңымыз да, шынымыз да –
Ілескен артымыздан ұлға аманат.

Тоқкөңіл тыныс та бар, ырыс та бар,
Заман да бірте-бірте дұрысталар.
...Түбі кеп күллі қазақ айта жүрер
Біздің де соңымызда бір іс қалар!

Ішкі сыры мен мұңын іркілмей ақтарыла сөйлеген ақын жалғанның жалған екенін әлдеқашан ұққандай-ақ. Шынында да, ақын қай тақырыпқа қалам тербесе де, сонша бір егіліп, езіле бермейді. Сөз астарында әлдебір асқақтық сезілетіндей. Ертеңгі күнге сеніммен қарау, келешектен үміт үзбеу, өмір шындығын боямасыз беріп, өлеңнің әрбір жолын ойға тез жатталып қалатындай етіп жазу – Сәкеңнің шынайы ақын ретіндегі шеберлігі болса керек.
Сәкен Иманасов 1938 жылы 2 мамырда Алматы облысы Алакөл ауданындағы Талапкер ауылында туған. Қазіргі Үш­арал қаласындағы Абай атындағы орта мектепті бітірген­нен ке­йін теміржол құрылысында қатардағы жұмысшы, аудандық комсомол комитетінің нұсқаушысы болған. Аудандық, кейін «Лениншіл жас» газеттерінде, облыстық партия комитетінде, Қазақстан Жазушылар одағында жауапты қызметтер атқар­ған. «Балдырған» журналында, «Қазақ мемлекеті» газетінде, Дүниежүзі қазақтары қауымдастығында жұмыс істеген. Ұзақ жылдар «Жазушы» баспасында редактор, редакция меңгеру­шісі, бас редактор қызметтерін атқарған. Алматы облыстық әкімшілігінде жауапты қызметте болды. Қазақ КСР Жоғарғы Кеңесінің депутаты болып сайланған.
Алғашқы өлеңі – 1956 жылы, содан бергі кезеңде: «Туған ауыл», «Ақ айдын», «Ақ дариға», «Жайдарман», «Ғашық дү­ние», «Алтын аймақ», «Ғашықпын саған», «Бел-белес», «Адыр­на», «Жебе», орыс тілінде «Созвучие», «Тетива» атты кітап­та­ры, 1993 жылы шығармаларының екі томдығы жарық көр­ді. 1998 жылы бір томдық таңдамалысы, 2001 жылы «Отырар кі­тапханасы» сериясымен «Қаламдастарым мен замандас­та­рым» атты эсселер, пайымдамалар, арнау өлеңдер кітабы шық­қан. 2003 жылы «Елорда» баспасынан соңғы он шақты жыл ішінде жазылған өлеңдері – «Өткірдің жүзі», естеліктері «Жазушы» баспасынан «Қалам мен заман» деген атпен жа­рық көрді. «Жазушы» баспасынан 2007 жылы шығармала­ры­ның екі томдығы, 2008 жылы таңдамалы шығармаларының 5 томдығы, балаларға арналған «Жәнібек пен атасы» атты кітабы шықты.
Көркем аударма саласында оның тәржімесімен шығыс шайыры Жалаладдин Руми, орыс ақындары А.Кольцов, В. Мая­ковский, ангола ақыны А.Нетто, саха М.Ефимов, қыр­ғыз А.Рысқұлов, С.Жусуевтердің кітаптары басылып шықты.
Ақынның Қазақстанның еңбек сіңірген қайраткері, Ал­маты облысының және Алакөл ауданы мен Үшарал қаласы­ның Құрметті азаматы деген атақтары бар.
«Барлығын,
барлығын да тастап енді,
ақының жайламақшы басқа белді», бұл – ақындық тағдырына мойынсынған қалам иесінің осыдан төрт-бес жыл бұрын жазған шумақтары. Маңдайға жазылғаны да сол: ақын, шынымен, барлығын да тастап, басқа белді – мәңгілік ме­кен­ді жайламақ.
Ақынмен қоштасу рәсімі бүгін сағат 10.00-де Алматыдағы М.Әуезов атындағы мемлекеттік академиялық драма теат­рында өтеді. Марқұмның денесі Алматы маңындағы Кеңсай қорымына жерленеді.
Өлеңін қалың қазақ оқырмандарына мұраға қалдырып бара жатқан ақын ағамыздың жатқан жері жайлы болсын!
«Алаш айнасы»