Түнгі мұражай тылсымға толы

Қарағандының бейнелеу мұражайы өзінің 25 жылдық мерейтойына орай түнгі мұражай жобасын ұйымдастыруда. Аты айтып тұрғандай, мұра­жай түнімен есігін айқара ашып, қарағандылықтарға тарихтан сыр шерт­пек. Түнгі мұражай халықаралық мұражайлар күні қарсаңында өткізілмекші.
Мұражай алдындағы алаңда күндіз Қарағандының суретшілері туындыларын көпшілікке ұсынып, сатып, көрмеге қоя алады. Ол үшін суретшілерден ақы, төлем талап етілмейді. Ал кішкентай балдыр­ған­дар «Әлемді бейнелеймін» деген тақырып­та қағазға, асфальтқа сурет салу бойынша байқауға қатысады. Кешкі сағат 18.00-ден бастап, 23 сағатқа дейін түнгі мұражай бас­талады. Онда мұражай қызметкерлері боди-арт жобасын ұсынады. Ол «Жанды мүсіндер» деп аталады. Яғни адам арқылы белгілі суретшілердің туындылары бейне­ленетін болады. Сондай-ақ мұражай қыз­меткерлері мұражай залын бірнеше бө­лік­ке бөліп, түрлі костюм киіп, онда тарихи ке­зеңдерді бейнелейтін көрінеді. Сонау адамзат пайда болған үңгірден бастап, бүгінгі ХХІ ғасырдағы Қазақстанға дейінгі ара­лықты қамтымақ.
Мейрамгүл ЕЛУБАЕВА, мұражай қызметкері:
– Атақты суретшілердің көркем туын­ды­ларына жан бітеді. Атап айт­қанда, Валентин Серовтың «Қыз бен шаб­далы», Франсиско Гойидің «Герцо­гиня Альба», Жан Этьен Лиотардың «Шо­коладшы» сын­ды озық туынды­ла­ры. Сонымен қатар, мұра­жайға келуші­лер алғашқы қауымдық құрылыстан бүгінгі егемен елімізге дейінгі тарихи дәуірлерді тамашалай алады. Олар то­ғыз секторға бөлінген. «Үңгірдегі өн­ер», «Ренессанс», «Орыс суретшіле­рі», «Сюрре­а­лизм. Сальвадор Дали және оның моде­лі», «Шоқан Уәлиханов су­реткер ретінде», «Қазақтың бейнелеу өнері», «Репрессияға ұшыраған сурет­шілер», «Қарағанды сурет­шілер одағы­ның негізін қалаушылар» және «Біздің замандастарымыз».
Бұл жоба мұражайда алғаш рет жүзеге асып отыр. Мұражай мамандарының айту­ын­ша, бұл алдағы уақытта жалғасын таба­тын болады.