Түркіні тағы бір түгендеді
Рухани астана Түркістанда III Халықаралық түркітану конгресі болып өтті. «Бүгінгі түркологияның өзекті мәселелері» атты тақырыпта өткен жиынға әлемнің 30-ға жуық елінен 100-ден астам делегат қатысты.
Бұл басқосу түркітану ғылымының өткені мен бүгінін саралап, келешекте атқаратын жұмыстары туралы өзекті мәселелерді шешуге арналды. Бұған дейін үш жыл бұрын исі түркі халқының орталығы Түркістанда мұндай басқосу өткізіліп, оған әлемнің белді түркітанушылары қатысқан болатын. Бүгінгі басқосуда ортақ тіл, тарих және әліппе жасау мәселелері қаралып, кеңінен талқыланды.
Ғалымдар өздерінің еңбектеріне әр сала бойынша секцияларда талдау жасады. Түркі дүниесінің жанашырлары өз ойларын ортаға салып, түркі дүниесінің өткен тарихын талдап, таразылады. Басты мақсат – бүгінгі түркі халықтарының рухани тұтастығын настихаттау болды. Түркия мемлекеті тарапынан көптеген ғалымдар қатысты. Еліміз тарапынан белгілі қоғам қайраткерлері мен ғалымдар қатысып, өзекті ой-пікірлерін ортаға тастады.
Білім және ғылым министрі Жансейіт Түймебаев: «Түркология ғылымын жандандырып жатырмыз. Бұл салада тер төгіп жүрген ғалымдарымыз жетерлік. Туыстас түркі халықтарының тілдерін зерттеуге атсалысып, халықаралық деңгейге шығуы қажет. Бүгінгі түркі халықтарының тілінде қалыптасып отырған өзекті мәселелерді бүкіл түркі әлемі болып шешуміз керек», – деді.
