«Түркістан нұры» таралуда

Айтар ойының айшықтығы мен көтерер мәселесінің салмақ­ты­лығы жа­ғынан бас­па­­сөз құрал­дары арасында альманахтың ма­ңы­зы аса зор екені даусыз. Таяуда Мемлекеттік тілді дамыту президенттік қорының қолдауымен «Қазақ» альманағы  жарық көрсе, енді соның ізін ала қазақ ақпарат айдыны тағы бір альманахпен толықты.
Алғашқы саны жұртшылыққа тара­лып үлгерген «Түркістан нұры» атты альманах Түркістан қаласында, жергілікті әкімшіліктің қолдауымен дүниеге келген. Көлемі 200 беттік альманахта Қазақстан мен Түркияның танымал ғалымдары мен ақындарының әдеби-мәдени, та­рихи-танымдық тақырыптардағы мате­риал­дары беріліп тұрмақ. «Түркістан нұры» сондай-ақ өлкенің тарихы мен мәдениетін жаңа қырынан зерделеуге аса назар аударып отыр. Басылымның бас редакторы түркістандық ақын әрі жазушы Нұрмахан Назаров.