Халық ұстазының есімі берілді

Оқу жылының басында Семей­­­дегі Абай атындағы музыкалық-сазды драма теат­рын­да аты аңызға айналған  халық ұста­зы, көрнекті қайрат­кер, Социалистік Еңбек Ері Жақия Шайжүнісовтің туғанына 100 жыл толу қарсаңына арналған «Қал­дыр­ған ізің мәңгілік...» атты салтанатты кеш өтті. Ғұмыр жолын ұрпақ аман­дығына арнап, қиын-қыстау кезеңде көптеген ұлттың балаларына қанатымен су сепкен қарлығаштай пана бола білген ердің еңбегін елі еш уақытта ұмытпайтыны анық. Әсіресе Көкпекті балалар үйіне тағдыр тәлкегімен жетімдіктің қамытын киіп, топ-тобымен келген көптеген ұлттың көген­көзін паналатқан ізгі жүректі жанның ісі қандай марапатқа болсын лайық.

Сол себептен болса керек, Ж.Шай­жү­ні­совке арналған кешке халық көптеп жиналды. Кеш барысында көрнекті қай­раткердің ғұмыр жолы баяндала отырып, арасында оның тұлғалық болмысын аша­тын өмір эпизодтары театр әртістерінің қатысуымен шебер сахналанды. Көрініс­тердің қай-қайсысы болсын көрермен көңілін толқытып, жанарларға жас үйірді десек, артық айтқандық емес. 1914 жылы Шыңғыстау топырағында дүниеге келген бала Жақияның өзі де үш жасында әкеден, сегіз жасында шешеден айырылып, жетім өсті. 1938 жылы 24 жасында Көкпекті ба­ла­лар үйінің директоры болып тағайын­далғанда ашаршылық пен нәубетті жыл­да­р­­дың тақсіретін тартқан талай жәу­­­­дір­­­­көз­дің тағдырына жауаптылық қоса міндеттелді. Міне, нақ осы жылдар­дан бастап, 150 ба­ла­ның амандығы үшін Жақия жанқияр­лық үлгі көрсетті. Тіпті Кеңес Одағы астанасы саналған Мәскеуге хат жіберіп, Көкпекті балалар үйіне жарық әкелдірудегі ісі де оның бала үшін бар ғұмырын сарп етуге даяр екендігін көрсетеді. Ал 1943 жылы Ұлы Отан соғысы кезінде жау қо­лын­да қалған қалалардың бірі – Орел облысынан ағылған 120 панасыз жеткін­шек­ті Көкпекті балалар үйіне қоныстан­дырған қамқорлығын ешкім де қайталай алмасы анық.
Осындай ерлікке парапар көптеген ісімен қатар, оқушыларды қоғамдық ең­бекке, оқуға, өз бетімен ізденуге баулып, ұстаздықтың ұлы қасиетін ұқтырған Жа­қия Шайжүнісов 1968 жылы Бүкілодақтық съезге қатысып, Социалистік Еңбек Ері атанды, Ленин орденімен марапатталды.
Бұл күнде Семей қаласында Жақия Шайжүнісов атындағы көше бар. Ер есі­мін ел есінде қалдыру мақсатында 2012 жылдың 1 қыркүйегінен бастап қаламыз­дағы қаржы-экономикалық электронды колледжіне Ж.Шайжүнісовтің есімі беріл­ді. Осынау ақжолтай хабарды көпшілік алдында жария еткен колледж басшысы Әлия Ағалиқызы электронды колледждің зияткерлік құқығы бар екендігін баяндай отырып, оқу орнында «Шайжүнісов шы­ңын бағындырушылар» үйірмесі жұмыс істейтіндігін, қайраткер еңбегін өнеге көзі ретінде насихаттайтын көптеген істің бар екендігінен хабардар етті.