Хор капелласы халықаралық байқауға қатысуда
Жамбыл атындағы қазақ мемлекеттік филармониясының Бақытжан Байқадамов атындағы хор капелласы Үндістанның орындаушылық өнер жөніндегі ұлттық орталығының шақыруымен Мумбайда өтетін халықаралық опера фестиваліне қатысуда.
Қазақстандық әртістер фестивальге ТМД мемлекеттерінің музыканттары арасында жүргізілген іріктеу барысында таңдап алынған. Хор капелласы конкурста Леонкаваллоның «Паяцы», П.Масканидің «Сельская честь» және Карл Орфтың «Кармина Бурана» атты шығармаларын орындайтын болады. Әртістерді дайындау үшін Италиядан шақырылған белгілі музыкант Диего Минголла арнайы мастер-кластар өткізіпті. Музыкалық фестивальге қазақстандықтармен қатар, әлемнің басқа мемлекеттерінен де келген әртістер қатыспақшы. 10 ақпанда тұсауы кесілген халықаралық өнер сайысы 25 ақпанға дейін жалғаспақшы.
