Зағиптар да «Көксеректі» көкірегіне сіңіреді
Шығыс Қазақстанда алғаш рет аудиокітап шығарылды. Жай аудиокітап емес, Мұхтар Әуезовтің әйгілі «Көксерек» повесінің үнтаспадағы нұсқасы. Мұнда бүкіл повесть желісі құрғақ әңгімеленбей, арнайы дыбыстық әсерлеумен қамтамасыз етілген. Мылтық атылған жер, қасқырдың ұлығаны, жараны ауырсынған дауыстар – осының барлығы автордың идеясынан тыс қалмапты. «Мұны ойлағаныма бір жылдай болған, ал жасауға екі-ақ апта кетті, ең қиыны әңгіме желісіндегі адамның, жануарлардың дауыстарын, эмоциясын дыбыстап дәл салу болды», – дейді кітап авторы Қуат Ахметжанов. «Дағдарыс бізге емес, байларға мықты әсер етіп жатыр-ау», – деп күлген Қуат бұл ісін жасауға бір адамның қол ұшын бермегендігін айтты. «Бар мақсатым – зағиптарға рухани қолдау көрсету. Өзім журналист болғандықтан, мұндай дүниелердің көзі көрмейтін жандар үшін тым аз екенін жақсы білемін», – деген Қуат аудиокітаптың әзірге 100 данасын ғана шығарыпты. Одан артық шығаруға жас жігіттің қалтасы таяз. 1 сағат 5 минуттық шығарманы оқып шыққан да автордың өзі. Бірақ бұл тың дүниеге қолдау жасамақ түгіл, оны жұртқа таныстыруда қала басшылығы аса ықылас білдіре қоймапты. Қалалық білім бөлімі тіпті мұның бізге ешқандай қатысы жоқ деген немқұрайдылық танытқан екен. «Зағип балаларға рухани білім беруде бұл кітаптың ештеңе тұрмағаны ма?» деп аудиокітап авторы аң-таң. Ол егер қолдау болып жатса, әлі қазақтың ертегілері мен батырлар жырын аудиокітап түрінде шығарамын деп отыр. Ал мына алғашқы жұмысының тең жартысынан астамын қаладағы зағип жандарға тарту еткен.
