Жағыпар трактор жасап алды

Ақтөбе облысы Ырғыз ауданында шөп шабуға арналған шағын трактор үлгісіндегі жаңа машина пайда болды. Оны 47 жастағы Жағыпар Қадыров құрастырып шығарған. Бірақ өзінің бұл жаңалығын әзірге ешбір құзырлы орынға жария ете қоймапты.
«Бұрын тракторға шалғы тіркеп шөп ша­батынбыз. «Өзі жүріп шалғымен шөп оратын машина құрастыруға болмас па?» деген ой біраздан бері мазалап жүрген еді. Биыл соны қолға алдым. Машина «Зид» мо­торымен жүреді. Төрт жылдамдық тетігі бар. Сыйымдылығы алты литр бензин құя­тын бак орнаттым. Бұл машина жа­нар­май­ды да үнемді жұмсайды. Мәселен, бір литр бензинмен Ырғыздың барлық көшесін шар­лап шығуға болады. Осы кезге дейін он шақты тіркеме шөп шаптым», – дейді Жағыпар Қадыров.
Өнертапқыш жігіт мұнымен де шектеліп қалмаған. Сиырдың тезегін басатын станок құрастырып, осы машинаға жалғаған. Жеті жүз литр су сыятын жеңіл цистернаны да осы машинаға тіркеуге ыңғайлы етіп жаса­ған. Содан бері Жағыпар ырғыздықтар үшін таптырмайтын адамға айналды. Тезек басып, я су әкеп, не шөп шауып берші деп қолқа салатындар көбейген. Бұған дейін де Жағыпарға түрлі техникаларын әкеліп жөндететін тұрғындар жеткілікті болатын. Осындай еңбегі арқылы күнкөрісін тауып, отбасын асырап отыр. Ол алдағы уақытта ав­токөліктер жөндейтін орталық ашу мақ­саты бар екенін де тілге тиек етті. Оның же­рін белгілеп, қажетті кірпіш және басқа мате­риалдарын әзірлеп қойыпты.
Жағыпардың жаңа машинасын сатып алуға ұсыныс жасаушылар да бірден табы­лып­ты. Алайда ол бас тартқан.