Жаяу Мұсаның ән дәстүрін жаңғыртқан кеш

Саф өнердің орнын сананы сансыратар даңғаза әуеннің басқаны ақиқат. «Адырна» ұлттық-этнографиялық бірлес­тігі қазақтың дәстүрлі ән өнеріне тағы да қолдау көрсетті. «Алаш айнасы» газетімен бірлесіп ұйым­дастырылған «Жаяу сал­дың жауһарлары» атты Жаяу Мұ­са әндерінің кеші жиналған қауым­ды бір серпілтіп тастады.
Жаяу Мұса мен Шорманның Мұстафа­сының арасындағы қақтығыс көрініс тапқан шағын қойылым барынша шынайы әрі әсерлі шықты. Шорманның Мұстафасы бейнесіндегі танымал әртіс Бауыржан Қаптағаев пен Жаяу Мұсаны сомдаған жас талант Бейбіт Қамаранов көрермен қа­уымды бірден баурап алды. Сал-серіліктің символы тәріздес алтыбақанмен, гүлмен көмкерілген жазиралы дала және қос қапталдай жайқалған орманмен бе­зен­дірілген сахна, ұлттық нақышта киінген әртіс­тер сол замандағы қаймағы бұзыл­маған қазақ өмірінен елес береді. Бұл – Қазақстанның еңбек сіңірген әртісі Сағыз­бай Қарабалиннің режиссерлік еңбе­гінің жемісі. Мәдениет және ақпарат министрі Дархан Мыңбайдың кешке ар­найы жол­даған құттықтауын оқыған Ғабит Мүсірепов атындағы Қазақ мемлекеттік академиялық балалар мен жасөспірімдер театры дирек­торының орынбасары Бақыт Бөкебаев ыстық ықыласын білдіріп, жобаға қолдау көрсетуге әзір екендігін жеткізді.

«Адырна» ұлттық-этнографиялық бірлестігіне, «Алаш айнасы» газетінің  ұжымына
Құрметті өнерсүйер қауым!
Ұлттық музыка мен халық компо­зиторларының тағылымды өмірін, қазақ­тың ұлттық құндылықтарын насихаттау мақсатында ұйымдастырылған іс-шараның маңызы зор деп білеміз.
 Жаяу Мұса – қазақтың музыка өнерінде өзіндік қолтаңбасын қалдырған, ешкімге ұқ­самайтын дара тұлға. Ол – ұлттық музыка дәс­түрін жаңғыртып, бүгінгі ұрпаққа жет­кіз­ген сұлу мінез, сырлы сөздің иесі. Оның ән­дері ұлттық нақышқа, өзіндік иірімге толы.
Даланың ғасырлар бойы жалғасып кел­­ген сал-серілік дәстүрін жаңа заманға жет­кізген Жаяу Мұса әндерін жадымызда жат­­тап, айтып жүру – бүгінгі ұрпақтың парызы.
Осындай игілікті істі көпшілік қауымға ұсынып жүрген сіздерге зор алғыс айтып, бо­лашақта жалғасын таба беруіне тілектестік білдіремін.
ҚР мәдениет және ақпарат министрі Дархан МЫҢБАЙ

Кеште Рамазан Стамғазиев, Жоламан Құ­жи­манов, Ерлан Төлеутай, Тілеулес Құр­манға­лиев, Еркін Шүкіманов, Еркін Нұр­ханов, Ерлан Құжиманов, Абзал Қуа­­­ныш­ұлы, Ерлан Рысқали, Жасұлан Ба­зар­беков, Талғат Әбуғазы, Саят Нұрғазин, Талғат Мұқышев, Уатхан Захан тәрізді өнерпаздар өз өнерлерін ортаға салды. Жаяу Мұсаның елі – Керекуден арнайы келген ғажап әнші Ербол Айтбаев көпшілік қауымның ризашылығына бөленді. Кештің бір жетістігі – дәстүрлі әннің Бақтияр Ақымжанов, На­риман Әбдірахманов, Нұрсұлтан Елемесов, Өзгеріс Шерікбайұлы, Жас­ұлан Сақаев, Жақ­сыгелді Майасаров сынды жас өкіл­де­рінің сахнаға көтеріліп, қанаттарының қа­тайғанын көрсетуі. Көпшілік басқаның емес, сол жас әншілердің сахнадан кетпеуін өтініп жатты. Жастардың орындауында та­лант­ты әнші, білікті ұстаз Жоламан Құжи­манов­тың үйретуімен архивтердің сөрелерінде шаң басып жатқан Жаяу Мұ­саның «Толғау», «Әрине», «Сынақ», «Тол­қыма», «Қаршыға, бүркіт», «Бұзау зары», «Келдім сізге», «Бәшерден», «Сүйіндік» сияқты бірқатар әндері тұңғыш рет үлкен сахнаға жол тартты. Өнер зерттеушісі, белгілі әнші Ерлан Төлеутай салтанатты шараны ұлы ком­позитордың өмірі мен шығармашы­лығына байланысты ай­тыл­маған тың деректермен өрнектеп өріп, тартымды жүргізді. Кештің толық те­ле­көрсетілімі «Алматы», «Мәдениет» те­леарналарынан көрсетілетін болады.
Өнерсүйер қауымның қаперінде болар, өткен жылдары Біржан сал, Ақан сері, Мұхит сияқты ұлы композиторлардың шы­ғар­машылықтарынан концерт ұйымдас­тырылған еді. Биыл Жаяу Мұса әндерімен басталған «Сал-серілер мұрасы» жобасы Үкілі Ыбырай, Балуан Шолақ, Естай, Әсет, Мәди, Қапез, Кенен әндерімен жалғасын таппақ. Атаулы жобаға Мәдениет және ақпарат министрлігі тарапынан қолдау болса, нұр үстіне нұр болар еді.