«Жібек жолын» көргіңіз келе ме?

Шығыстың өмірін бейнелейтін «Аттар», «Ләйлә және Мәжнүн», «Ұста», «Шаңырағымызға шақырамыз», «Екі балық», «Қауын», «Екі ғашық», «Керамика шебері», «Керуен – 2» секілді шығармалар қараған адамды бей-жай қалдырмасы анық.
Көпшілік әрқилы қабылдайтын абст­рактылы туындыларды бейнелеуді таңда­ған шебердің «Жібек жолы» атты көр­месіне жалпы 46 еңбегі қойылыпты. Бұл – Астана қаласындағы Қазіргі заман өнер мұражайында өтіп жатқан суретші Ахмет Ақаттың еңбектері. Ол өз еңбектерінде Қашқарияның мешіттері мен шіркеулері, ауылдары мен қалаларын суреттеуге ты­рысады, өйткені осы Шыңжаң қаласынан Памирге дейінгі аралықтағы барлық шы­ғыс қалаларының көне заманғы ғажайып ерекшеліктері осы өңірлерде сақталған. Ал Қазақстан мен Өзбекстан қалалары та­қырыбында суретші өзге қырынан таны­латындай, мысалы, Қожа Ахмет Яссауи мав­золейін т.б. жұмыстарында олардың тарихта қалған нысандар екенін айрықша көрсетуге тырысқан, әрі бұл еңбектерінде қылқалам шебері архитектуралық құры­лым мен адам баласының қолынан шық­қан қайталанбас өнер туындыларын көр­сетуге талпынған.
Ахмет Ақат 1954 жылы Қытай Халық Республикасының Құлжа қаласында дү­ниеге келген. Болашақ өнер иесінің отбасы 1959 жылы Қазақстанға келіп, ол 1974 жылы Абай атындағы Алматы педагоги­калық институтының көркемсурет-гра­фи­ка факультетін тамамдап, кейіннен өнер­тану факультетінде аспирантурада оқыған. 1980-1983 жылдары Мәскеудегі «Се­неж», 1983 жылы Рига қаласындағы «Дзин­тари» шығармашылық үйіне, 1990 жылы Германияның бірқатар қалаларына шығармашылық іссапарға барады. 2003 жылы Ташкент қаласындағы ІІ Халық­ара­лық Артбиеналға қатысып, арнайы жүл­деге ие болады. 1988 жылдан Қазақстан Суретшілер Одағының мүшесі, 2004 жы­лы майталман суретшіге ҚР Еңбек сіңірген қайраткері атағы берілді.
Суретшінің еңбектері Ә.Қастеев атын­дағы Мемлекеттік өнер мұражайында, ҚР Мәдениет министрінің көркемсурет ди­рекциясында, Мәскеудегі Мемлекеттік Шы­ғыс халықтарының өнер мұражайын­да, Елбасы Н.Ә.Назарбаевтың «Ақ орда» ре­зи­денциясында, сонымен бірге Қазақ­стан, Германия, Италия, Қытай, Ресей, АҚШ, Түр­кия және өзге де елдерде арнайы көр­мелерде орын алған.
Ахмет Ақаттың «Жібек жолы» көрмесі маусым айының 25-іне дейін жалғасады.