Егіз балалы болғым келеді
Көп қыз-келіншектер егіз балалы болуды армандайды. Бірақ егізді қалайтындар «тұқымымызда егіз бала туғандар жоқ еді, бізде бола қоймас» деп үміттене қоймайды. Егіз, үшемдердің дүниеге келуі генге байланысты ма жоқ әлде басқа да себептері бар ма?
Алматылық акушер-гинеколог Айнұр Маратқызының айтуынша, егіздердің туылуы тек генге ғана байланысты емес, басқа да себептері бар.
Кейінгі жылдары әлем бойынша егіздер мен үшемдер дүниеге келуі жиілеген. Бұл медициналық тәжірибеге жоғары тиімді репродуктивті технологиялардың кеңінен енгізілуіне байланысты болып отыр. Егіздердің дүниеге келуіне мынындай факторлар да әсер етеді екен:
Тұқым қуалаушылық (егер бұрын ер адам мен әйел адамның әулеттерінде егіздер дүниеге келген болса, онда егіздерге жүктіліктің ықтималдығы артады); 30 жастан асқан әйелдің жүктілігінде егіз бала көтеру ықтималдығы жоғары, гормоналды контрацептивтермен сақтанатын әйелдер препараттарды ішуді бірден тоқтатқанда егі бала көтеруі мүмкін, бедеулікті емдеуде овуляцияны ынталандыру әдістерін қолдану кезінде де егіз баланың дүниеге келуіне себеп бола алады және экстрокорпаральды ұрықтандыру әдісі арқылы да егіздер жиі туылады.
Мамандардың айтуынша, осыдан 30 жыл бұрын табиғи жолмен егіздердің дүниеге келуі 100-ден 30 пайызды құраса, қазір жаңа репродуктивті технологиялардың дамуымен 50 пайызға артып отыр.
Айнұр Сенбаева
