Оразаның қазасын өтеуге қатысты төрт сауал
– Рамазан оразасының қаза күндерінің арасын үзбей тұту шарт па?
– Шарт емес. Ораза тұтушы қаза күндердің арасын қаласа бөліп немесе арасын үзбей тұтуына болады.
– Рамазан оразасын келесі рамазан айы кіргенше тұтпай кешіктірсе не істейді?
– Әуелі келген рамазан айының оразасын тұтады. Өйткені, бұл уақыты келіп тұрған парыз ораза. Соңынан қаза оразаны тұтады. Оразаның қазасы кешіктірілгені үшін фидия берілмейді.
– Мойнында рамазан оразасының қазасы бар кісі қайтыс болса. Ол отбасына тұта алмаған оразасының фидиясын беруді өсиет еткен болса, уәлилері (марқұмның иелері) не істеу керек?
– Марқұмның өсиеті артынан қалған дүние-мүліктің үштен бірінен өтеледі. Өсиетті орындаушы туыстары әр қаза ораза күніне бір мұқтаж жанды тамақтандырады[1].
– Рамазан айының каффараты алпыс күн ораза тұту. Осы алпыс күннің арасын үзіп тұтуға бола ма, әлде бөліп - бөліп ұстауға бола ма?
– Рамазан оразасының каффараты алпыс күн. Алпыс күнді араларын үзбей тұту керек.
