Пайғамбар (с.ғ.с.) өз қасында сарай ақынын ұстаған ба?
Пайғамбардың (с.ғ.с.) дәуірінде исламнан бұрын және кейін де араб жазирасына мәшһүр шайырлар болды. Олардың кейбірі исламды қабылдаса, басқалары өз діндерінде қалды. Себебі шариғат бойынша адам өзінің дінінде қалуға құқылы, - деп хабарлайды Alashainasy.kz тілшісі Kazislam.kz-ке сілтеме жасап.
Мұхаммед (с.ғ.с.) пайғамбар һәм мемлекет басшысы болса да сарайда тұрмады. Сол үшін кейінгі сұлтандар мен әміршілер сияқты зәулім сарайда уәзір, ғалымдар мен ақындарды ұстауға зәрулік болмады. Бұл кезде Ислам жер жаһанға енді тарап жатқан кез болатын.
Алайда мұсылман шайырлары пайғамбарға және сахабаларға да арнап өлеңдер шығарған.
Мысалы, Хассан ибн Сәбит (554-674) – жаһилия әрі ислам кезеңінде өмір сүрген және пайғамбардың шайыры ретінде әйгілі болған ақын мухадрам. 60 жасында исламды қабылдаған ол, заманының озық ақындарының бірі болып, пайғамбар мен мұсылмандарға арнап өлеңдер жазды. Ақын өзінің өлеңдерімен мұсылман жауынгерлерінің рухын көтерген.
Сонымен қатар түрлі айтыстарға қатысып, мұсылмандарға идеялық қолдау көрсетті.
Хасан ибн Сәбит шамамен 120 жасында туған қаласы Мәдинада қайтыс болады.
Жалғас САДУАХАСҰЛЫ
