Қайтыс болған адамға Құранның сауабы жете ме?
Сұрақ: Қайтыс болған адамға Құран бағыштап оқылса, оған сауабы жете ме?
Жауап: Сіздің қандай да болсын сол кісіге сауабы барсын деп жасаған игі дұғаңыз, оқыған Құран хатымыңыз немесе берген садақаңыз, тіпті сол кісінің атынан барған қажылығыңыз (үлкен, кіші) барлығы Алла қаласа ол кісінің артында қалған салихалы ұрпағының жолдаған сауаптары жазылатын амал дәптеріне міндетті түрде жазылады.
Сөзімізді Алла елшісінің (с.ғ.с) хадистерімен дәлелдей түссек.
Ибн Аббас: «Бір кісі Алла елшісіне (с.ғ.с) келіп, анасының өмірден озғанын естіртті де: «Оның атынан садақа берсем, оған пайдасы тие ме?» - деді. Пайғамбар: «Иә!» – деп жауап берді. Ол: «Менің құрма бағым бар. Шынымен де, соны анамның атынан садақа еткеніме сені куә етемін», – деді деген. (Сахих әл-Бұхари, 2/102)
Әбу Һурайра Алла елшісінің (с.ғ.с):
«Расында, адамның жәннатта дәрежесі көтерілгенде ол: «Бұл қалайша?» – дейді. Сонда оған: «Балаңның саған тілеген дұғасы арқылы», – делінеді». (Сунан ибн Мажаһ. 2/1207)
«Мүмін дүниеден озған соң амалы мен жақсылықтарынан пайдасы тиетіні – үйреткен және таратқан ілім, артында қалдырған салиқалы баласы, мұра етіп қалдырған мұсхаф, не тұрғызып кеткен мешіт, не жолда қалғандар үшін салып кеткен үй, не ағызып кеткен өзен, не дені сауда, тірі кезінде мал-мүлкінен бөліп шығарған садақа, бұлар оған дүниеден озған соң пайдасын тигізеді», - деп айтқанын жеткізген.
