Қалжындап «талақ» десем талақ бола ма?
Ассаләму алейкум! Әйеліме қалжындап «талақ бол» десем, талаққа жата ма? Неке бұзыла ма? Анон.
Уағалейкумуссәләм уә рахматуллаһи уә бәракәтуһ!
Сахаба Әбу Һурайрадан риуаят етілген хадисте Мұхаммед пайғамбар ғалейһиссәләм былай деген:
«Үш нәрсенің шыны да шын, әзілі де шын. Олар: Неке, талақ және қайтару»[1].
Ендеше, Ханафи мәзхабы бойынша, қалжындап болсын әйеліне «талақ бол» деп айтқан кісінің талағы - талаққа саналады. Алайда, одан бұрындары талақ сөзі айтылмаған болса, бұнысы «бір талақ» үкімінде болып, неке бұзылмайды. Әйткенмен, ер кісіге берілетін үш талақ айту құқы – екіге кеміген болады.
[1] Әбу Дәуід - №2194 хадис.: Хадистегі «қайтару» сөзінің мәні: ері бір рет не екі рет талақ айтқаннан соң үш хайыз уақыты ішінде неке жаңартпастан әйелімен татуласып, оны қайтарып алуына құқылы. Татуласы ісі – белгілі әрекеттер арқылы немесе «қайтардым» деп айту арқылы жүзеге асады. Егер, ері қалжындап болсын қайтардым десе, онысы қайтарғанға саналады.
Абдусамат Қасым
