Рамазанды неліктен «Құран айы» деп атайды?

Өйткені, Алла Тағала Құран кәрімді адам баласына Рамазан айында түсірді: «Рамазан айы – адамдар үшін тура жол көрсететін, дұрыс пен бұрысты айыратын дәлел түрінде Құран түсірілген ай» (Бақара: 185), - деп хабарлайды Alashainasy.kz тілшісі kazislam.kz-ке сілтеме жасап.

Жоғарыдағы аяттың негізіне сәйкес «Рамазан – Құран айы» деп те айтылады.

Бірақ, «Рамазан айы – Құран айы» деген уақытта тағы бір ескеретін жағдай: бұл айда Құранды көп оқып, Аллаға арнап жасалатын тағат-ибадатты көбейту қажет.

Әрине, біздің барлығымыз Құранды араб тілінде оқи алмаймыз. Әйтседе, ең болмаса Құранды кирил әрпінде немесе оның қазақша аударма-мағынасын оқып, айтылған аят мазмұндарына ой жүгіртер болса, бұл да Алланың алдында құлшылық саналмақ.

Осылай Рамазан айын құлшылықпен өткізген саналады.

Пайғамбар (с.ғ.с.) бізге Құранды үздіксіз үйренуге және үйретуге шақырды. Ондағы әрбір әріпке сауап жазылмақ:

«Сендердің ең жақсыларың Құранды үйреніп және басқаға үйреткендерің»; «Балаларыңды үш түрлі қасиетке баулыңдар: Пайғамбарларыңды сүюге, оның әулетін құрмет тұтуға және Құран оқуға. Шын мәнінде, Құранды жаттағандар ешқандай көлеңке болмайтын Қиямет күнінде Алланың Аршысының көлеңкесінде тұрады» (Имам Табарани).