Жұма намазы аяқталмай, әйелдер бесін намазын оқуға бола ма?
Ер адамдар жұма намазынан шықпай тұрып, әйелдер бесін намазын оқуға бола ма?
Әйел адамда және өздеріне жұма намазы парыз саналмайтын науқас адамдар уақыт кіргеннен кейін, имам жұма намазын бітірмей тұрып өз үйінде бесін намазын оқи беруіне болады.
Өздеріне жұма намазы парыз болмағандар қалада немесе қала үкімінде саналатын бір жерде бесін намазын жамағатпен оқуы мәкрүһ болады. Өздері жеке оқу керек.
Өзіне жұма намазы парыз болған адам, үзірсіз (себепсіз) жұма намазына бармай, имам жұма намазын бітірмей тұрып өз үйінде сол күнгі бесін намазын оқитын болса Ханафи мәзһабының пікірінше бұл намазы жарамды, бірақ жұмаға бармағаны үшін күнәһар болады.
Басқа үш мәзһаб пен Ханафилардан Имам Зүфәрдің көзқарасы бойынша дәл жұма намазы уақытында оқыған бесін намазы жарамсыз. Жұма намазы біткеннен кейін қайта оқуы керек («Мәрғинани, Хаидая, I, 90-91).
