Әзірбайжан Мәмбетов феномені

Өнер – өмірдің көркем бейнесі, өнер тұлғасы мәдени үлгінің көшірмесі, әлеуметтік-мәдени жүйенің элементі ретінде қарекет етеді. Адамгершіліктің қадірі қашқан, рухани құнды­лық­тарға сусаған қазіргі модер­низация дәуірінде режиссердің көркемдік әлемінің дәстүр мен жаңашыл­дық­ты қабыстырып, уақыт ая­сын­да үзілген алтын өзекті жіпсіз байлайтын құдіреті сахнаны тамашалай келген кез келген жанды бас игізбей қоймайды.
Шынайы өмірдің көріністерін театр сахнасында шебер өргізген Әзірбайжан Мәмбетовтің естен кетпес қойылымда­ры­ның куәсі болғанымыз кеше ғана еді. Әл-Фараби атындағы ҚазҰУ-дің Философия және саясаттану факультетінің дінтану және мәдениеттану кафедрасының ұйытқы болуымен КСРО және Қазақ КСР Халық әр­тісі, КСРО Мемлекеттік сыйлығының лау­реа­ты, Халық Қаһарманы, профессор Әзір­байжан Мәдиұлы Мәмбетовтің 80 жасқа толуы қарсаңында және Алматыдағы мәде­ниет жылы аясында философия ғылымы­ның докторы, профессор Молтобарова Күмісбала Ищанқызының «Режиссер Мәм­бетов феномені» атты кітабының тұсаукесері өткізілді. Театр тарланы туралы жаңа кітап ҚР Президенті Н.Ә.Назарбаевтың бастама­сымен – Әзірбайжан Мәдиұлы Мәмбетовтің есімін ел тарихында қалдыру мақсатында «әлеуметтік маңызы бар әдебиеттерді басып шығару» мемлекеттік бағдарламасы аясында жарияланған. Бұл еңбекте Қа­зақ­с­танда алғаш рет режиссер тұлғасы мен шығармашылығына мәдени-философия­лық тұрғыдан талдау жасалған.Тұсаукесер аясында режиссер туралы фотокөрме ұйымдастырылды. Шараға КСРО және Қазақ КСР Халық әртісі, Мемлекеттік сыйлықтың лауреаты А.Әшімов, ҚР Халық әртісі Е.Обаев, Абай атындағы ҚазҰПУ-дің оқу ісі жөніндегі проректоры, философия ғылымының докторы, профессор А.Құлса­рие­ва, филология факультетінің деканы Қ.Әбдезұлы, факультет деканы Ә.Масали­мова, дінтану және мәдениеттану кафедра­сының меңгерушісі А.Құрманалиева және өзге оқытушы профессорлар қатысты.
Мұқан Нұрзат Дінтану және мәдениеттану кафедрасының оқытушысы