Мәңгілік құндылықтар мұражайы жаңа кезеңге аяқ басты
Ықылас атындағы қазақтың халық музыкалық аспаптарының мұражайы күрделі жөндеуден соң қайта ашылды. Халықаралық мұражайлар күні қарсаңында мұнда ақпарат құралдарына арналған «Мәңгілік құндылықтардың жаңа экспозициясы» атты шара өтті.
Мұражай ұжымы журналистер үшін ұлттық музыканың көне дәуірлеріне жетелейтін танымдық қысқа экскурсиялар ұйымдастырды. Әуенге толы даланы көз алдыңа әкелетін жаңа залдарда қобыз, адырна, жетіген, сазсырнай сияқты аспаптардың қилы тарихы жайлы мағлұматтар берілді. Ақпарат құралдары өкілдері бұл күні сол аспаптарда ойнауды үйренді. «Тұран» фольклорлық-этнографиялық ансамблінің музыканттары шеберлік дәрістерін өткізді. Жас өнер ұжымы жиналғандарға саф музыкадан концерт те ұсынды. Мұражай Халықаралық мұражайлар күні түнді осында өткізуге шақырады. Айта кетейік, халық аспаптары мұражайының ғимараты күрделі жөндеуден өткеннен кейін оның сыртқы келбетімен бірге мазмұны да өзгермек. Мұражай жұмысын мәдени-ғылыми орталық ретінде дамытудың жаңа стратегиясы қабылданып отыр.
