Күкірт қышқылынан қауіп бар ма?

Қызылорда облысының Жаңақорған ауданы аумағында күкірт қышқылы зауытының құрылысы жүріп жатыр. Бұл – еліміздегі индустриялық-инновациялық даму бағдарламасына енгізілген жобалардың бірі.
Аталмыш жобаның құны да қымбат. Оған 216 млн АҚШ дол­лары шамасында қар­­жы жұм­салады деп күтілуде. Халық­ара­лық деңгейдегі іргелі іске жа­по­ния­лық және канадалық ком­па­ния­лар қызы­ғу­шы­лық танытып, оны жүзеге асыруға білек сы­бана кірісіп отыр. Алдағы уақытта зауыт­­та 500 мың тонна өнім шы­ға­рылады. Атал­мыш өнім об­лыс­тың Шиелі және Жа­ңа­қор­ған ау­дандарындағы табиғи уран өн­ді­ретін кен орындарына жі­бе­рі­ле­ді.
Бүгінгі күні өндіріс ошағының құрылысы қар­қынды жүріп жатыр. Бас мердігер – «ЗСМК» ЖШС болса, энергетикалық жаб­дық­тармен «Союзкомплект» ЖШС ай­на­лы­суда. Бұл жоба аймақтың әлеуметтік-эко­но­микалық жағдайын жақсартуға оң сеп­тігін тигізеді. Зауыттың негізгі шикізаты «Те­ңізшевройл» компаниясынан жеткізі­ле­ді. Аталмыш компаниядан шикізат 20 жыл бойы үздіксіз келіп тұрады.
Күкірт қышқылы зауытының қоршаған ортаға зиянды әсері бар ма? Оған маман­дар өз жорамалын айтады. Күкірт қышқылы зауы­тының бас директоры Мәдихан Бек­жанов бұл өндіріс ошағы ешқандай залал тигізбейтінін айтады.
Мәдихан БЕКЖАНОВ, Күкірт қышқылы зауытының директоры:
– Зауыт құрылысы тектен-текке қолға алынған жоқ. Оны жүргізуде бар­лық жайды ескердік. Әлемдік тәжі­ри­бе­ге ден қойдық. Рас, елімізде бұрынғы ескі технологиямен салынған осындай зауыттар бар. Біз қолға алған іс олардан өте күрделі. Экологиялық жағынан өте таза өнім саналады. Дүниежүзінде мұн­дай зауыт тек Италияда ғана бар. Сол жерде болып қайттық. Жағдайды тара­зы­ға тартып көрдік. Ол елде мұндай зауыт 300-ден астам курорты бар Сар­ди­ния аралында қоныс тепкенінің өзі көп жайды аңғартады. Сондай-ақ онда қосалқы өнім шығаратын жеті өндіріс ошағы да бар. Зауыт қондырғысының сапасы мықты. Шығатын түтін 0,01 пайыз­ды құрайды. Бұл – білінер-білін­бес деген сөз. Қысқасы, өнім өндіруде еш­қандай қолайсыз жағдай туын­да­май­ды.
Күкірт қышқылы зауыты тек уран өндірі­сі­не ғана өнім әзірлемейді. Бұл жерде ауыл шаруашылығына қажетті минералды ты­ңайтқыш өндірілмек. Сонымен қатар 18 МВт электр қуаты дайындалады. Кәсіпорын 8 МВт шамасында өз қажетіне жаратса, қал­ғаны аудан халқының игілігіне жұм­са­ла­тын болады.