Жылыжай мол өнім мен толайым табыс көзі
Тәуелсіздік алғаннан кейінгі жылдары ескі тәсілмен жұмыс істеп келген шаруалардың алдына ауыл шаруашылығын өркендету, инновациялық технологияларды ендіру, соның бір басым бағыты ретінде жылыжай салып, бақша, көкөніс өнімдерін еселеп арттыру, жерді тиімді игеру осы арқылы көрші елдердің импортынан құтылу мақсаты қойылған еді.
.png)
Бүгінде сол мақсатқа ақырындап жетіп келеміз. Жүргізілген тиімді реформалардың арқасында елімізде жыл санап жылыжайлар саны артуда. Әсіресе көктем мен күзі жылы, жазы ыстық келетін Оңтүстік Қазақстан облысында бұл кәсіп ерекше дамыған. Соңғы деректерге жүгінсек, бүкіл Қазақстан бойынша жылыжай көлемінің 75 пайыздан астамы күнгейдегі осы облыстың үлесінде екен. Ал 2016 жылы жылыжай орналастырылатын жердің көлемін Елбасының тапсырмасына сәйкес 800 гектарға жеткізу жоспарланған еді. Бүгінгі күннің өзінде еліміздің солтүстік аймақтары және Германия мен Ресейді бақша өнімдерімен қамтамасыз етіп отырған өңіріміз өзімізді де қарық қылып, өзгеге де беретіні мол болмақ.
Әсіресе оңтүстік өңірдің жылыжайлар өнімі үлкен сұранысқа ие болуда. Бұл да болса оңтүстік өңірдегі жерді игеру бағдарламасының толығымен жүзеге асып жатқанының белгісі болса керек. Мәселен Мақтарал ауданына қарасты "Хамро-ата" шаруа қожалығының басшысы Боев Абдужалил 2,0 га жерге жылыжай инвестициялық жобасын іске асырған. Бүгінде шаруа қожалығы иесін өңірдегі озық шаруалардың қатарына ендіріп отырған жылыжайдан алдағы уақытта күтілер үміт зор болып отыр.
