"Бәлені тек қазақша сөйлейтіндер бастайды" деген аргументті әр жерге сумаңдатып тыға бермеген дұрыс.
Ақпанның 9-ы күні, Алматы қаласындағы Онкология орталығына бардым. Қасымда шешем бар. Екеуіміз кіреберістегі талон алатын орында тұрмыз. Сол жердегі медбикемен қазақша сөйлесіп, ақпарат алып жатыр едік. Қасымызда бір орыс апа болды (кәрі деуге келмейді). Әлгі кісі біздің қазақша сөйлесіп тұрғанымызды қарап тұрды да, медбикеге : "Неге орысша жауап бермейсіз, бұл қалай сонда?" деп ренжіп, кәдімгідей ызаланған мінезін көрсетіп, есіктен шығып кетті.
Енді мәселе мынау: әлгі медбике бізбен сөйлесіп тұр. Ортаға килігіп келіп, бұлай мінез көрсетіп, жауабын алмастан бұрылып кетіп қалатындай оның қандай құқығы бар? Егер ол медбике ол кісіге мүлде орыс тілінде жауап бермей қалса, түсінемін. Тіпті қасымызда өзге бір тау халықтарына жақын ұлттың өкілі қазақша сайрап тұр.
Қысқасы, "бәлені тек қазақша сөйлейтіндер бастайды" деген аргументті әр жерге сумаңдатып тыға бермеген дұрыс.
Фейсбуктегі парақшасынан
