Бір қыздың шетке кеткені - ұлттық трагедия ма...
Қашан біреудің жеке өміріне қол сұқпауды үйренеді екенбіз? Бір қыздың шетке кеткені - ұлттық трагедия ма, әлде жылына жүздеген қыздардың өз елінде зорланып, қор боп жүргені трагедия ма?
Елдегі әлеуметтік жағдай қиындап барады. Салдармен емес, себеппен күресу керек. Әділ сайлау, тәуелсіз БАҚ-тар туралы заңдар маңызды емес, "Төрт әйел алу туралы заң" қабылдануы керек!
Қылмыстық кодексте адам зорлау бабын ауыр қылмыстар санатына жатқызу, жемқорларға айыппұл төлеп шығуға мүмкіндік бермей, ұзақ жылдарға отырғызу маңызды емес, шетелге кеткен, африкалықтарға тұрмысқа шыққан қыздарға да айыппұл төлету, шетелдіктерге салық салу керек! Міне, әйелге деген көзқарас. Сонда әйел тауар ма, сатып алып, салық салынатын...
Қыздарымыздың шетке кетуін мен де қолдамаймын. Бірақ екінші мамандығым заңгер ғой, айтайын, біреудің той суреттерін алып, боқтап, лағынеттеу қылмыстық кодекспен жазаланады.
Әлеуметтік, нәсілдік дискриминацияға жол жоқ. Этика қайда? Жоғары мәдениетіміз қайда? Қыздарымыз шетке кетпесін десек, қауіпсіз елге айналайық! Тапа-тал түсте олимпиада чемпиондары өз мүлкін қорғаймын деп жапа шекпесін, пойызда, Тальгода (!) қыздар зорланбасын, жемқорлар түрмеден шықпасын, педофилдер бала зорламасын (өлім жазасына кесілсін), әскерде әлімжіттік болмасын, әскери қоймалар жарылмасын, шенділер халыққа Лондоннан сәлем жібермесін, пациенттердің дөрекілігінен дәрігерлер түрмеде отырмасын, "ауруханада бостан-босқа жатасыңдар" деп жоғары жақтан оттамасын...
Камшат Тасболат
Фейсбуктегі парақшасынан
