Мен қалай болса солай басқарылғым келмейді!
ТАҒЫ ДА ТІЛ ТУРАЛЫ
"Қандай болсаңдар, солай басқарыласыңдар" деген хадис бар. Біздің ана тілімізге қатысты мемлекеттік саясатты кинотеатрдан анық байқаймыз. Өкініштісі сол, хадистегі айтылған ащы шындық секілді оған етіміз өліп барады. Мəселен, үлкендерге, отбасыға, əруақтарға, музыкаға құрмет секілді құндылықтарды қамтыған, қазақ тіліне əдемі аударылған, сəтті дубляж жасалынған "Коконың құпиясы" атты мексикалық мультфильм ана тілімізде алматылық бірен-саран кинотеатрда күніне небəрі бір рет қана көрсетіледі. Оның өзінде, ертеңгі уақытта, адам көп бармайтын кезде. Сондықтан, мүлде тұтынушы жоқ деген сөз. Ал қалған кинозалдарда тек орыс тілінде көрсетіліп жəне күніне 4-5 рет өте тиімді сəттерде көрермен жинайды. Тіпті, кейбір кинотеатрлар қазақ тіліндегі онсызда аз киноларға шекесінен қарағаны соншалық, кестесінен орын да бермейді. Сонда не істеген жөн? Сұранысты өзіміз артыруымыз керек. Қазақ тіліндегі шығармаларға көптеп баруымыз қажет (!). Басында қиналармыз, бірақ түптің-түбінде жеңіп шығамыз. Өйткені, мен қалай болса солай басқарылғым келмейді! Сіз ше, қалай ойлайсыз?..
Дәрмен Смайыл
Фейсбуктегі парақшасынан
