Шайтанның әйелінің аты кім?
Молда мешітте халайыққа уағыз айтып бітіп:
– Егер түсінбегендеріңіз болса, қысылмай, сұрап отырыңыздар. Қане, кімде қандай сауал бар? – дейді.
Сөйтсе, арт жақтан біреу қол көтеріпті де, әй жоқ, шәй жоқ:
– Осы шайтанның әйелінің аты кім? – деп қойып қалыпты.
– Шайтанның әйелінің атын дауыстап айтуға болмайды, бері кел, құлағыңа сыбырлайын, – деп молдекең оны жанына шақырып алыпты да, даусын бәсеңдетіп:
– Сенің денің сау ма өзі? Шайтанның әйелінің атын мен қайдан білейін? Үйлену тойларында болыппын ба? Сұрайтын басқа ештеңе таппай қалдың ба? Бар да, қайдағыны сұрамай тыныш отыр! – деп жер-жебіріне жетіп, ұрсып тастайды.
Әлгі бейбақ орнына барып отырса, қасындағылар «шайтанның әйелінің аты кім екен?», «аты кім екен?» деп қайта-қайта сұрап қоймаса керек. Сонда ол:
– Шайтанның әйелінің аты өте ұзақ һәм тым қиын екен, тілім келмейді, оны тек молдекең ғана айта алады. Білгілерің келсе, өздерің барып сұраңдар, – депті.
Сәкен Сыбанбай
Facebook-тегі парақшасынан
