"Шаңырақ" пен "Думанда" Заманбек ағамыздың ескерткіші тұрса артық етпес еді

ЗАМАНБЕК НҰРҚАДІЛОВ АҒАМ ЕСКЕ ТҮСТІ БҮГІН

Ауламызда бордюрбек науқаны қайнап жатыр. Шаң, құм, ыстық әспәліт... Мен Алматының ортасында, сол Заманбек аға сыйлаған үйде тұрам. Үйімізді кезінде Қазақ ССРінің қорғаныс министрлігі үшін салған екен. Ұзын үй, бірнеше пәдиез. Есіктің алдына темекі шегуге шығып, жұмысшылармен танысып, көбі Нарынқол жақтан екен, әптәритетім өсіп, бордюр мен әспәліт төсеудің қыр-сырын меңгеріп қалдым.
Содан, бүгін бригәдір әңгіме үстінде "Аноу ең басындағы екі пәдиез картада жоқ екен, бірақ олардың да алдын жасадық" - деп қалды...
Заманбек ағаның үйінде отырғанда кейде өзінің қызықтарын айтып қалатын кезі болатын. Бір күні:
- Алматының құрлысын басқарып тұрған кезім, қазаққа өшірет жетпейді, кезекте мыңдаған адам. Сол кездің өзіне орыстар үйсіз емес. Кеңес үкіметінің кезі ғой, қол қысқа. Микрорайондарды салып жатырмыз. Горкомдағы, Райкомдағы намысты жігіттермен келістік сосын. Қалада құрлыс көп қой, бәріне емес, кейбіреуіне бір, екі подъезд қосып салатын болдық. Ол көбіне ведомсволық үйлер салғанда жақсы еді. Олар ведомствосындағы адамға пәтер жетсе болды, ар жағын санамайтын. Сөйтіп, кезекте тұрған біраз қазаққа пәтер тиді..." - деп еді. Бағанағы бригадир айтқан кезде осы еске түсіп, толқып кеттім...
"Шаңырақ" пен "Думанның" бір көрікті жерінде Заманбек ағамыздың ескерткіші тұрса артық етпес еді иә, ағайын?...

Асқар Наймантаев
Фейсбуктегі парақшасынан