Тау басында жүргенімде дүниеге келген "жылқышы" - қыз бала, "қойшы" - ұл бала секілді еді...
Басқа жақты білмеймін, біз жақта "таудан түстің бе?" деген сөз бар. Бірдеңені қате айтып тұрсаң осылай дейді. Кейінгі кезде байқасам, өзімді таудан түскендей сезінетін болыптым. Әр нәрсеге күдікпен қараймын, біліп тұрсам да, білмейтін сияқты қуыстанып тұрамын. Таудан түскендей сасқалақтап қаламын. Таудан түскенім енді өтірік емес,100 пайыз ып-рас. Тау болғанда қандай тау десеңізші! Бергісі Қазақстан, арғысы Орталық Азиядағы ең биік шың -Тәңіртаудың өзінен түстім ғой. Қасиетінен айналайын сол Тәңіртаудан төмен түсіп көрмеген қара шал мен қара кемпірлер "Қойшыңның бауыры берік болсын!", "Жылқышыңның жасы ұзақ болсын!" деп тілек айтқандарын көрдік. Етекке түскелі, әлеуметтік желіге кіргелі осы сөздер кей-кейде алдымнан шығып қалады. "Сүйінші ағайын, жылқышы келді",-деп қуаныштан шаттанып жатады бір бауырым. Ал, тілек білдіруші жұрттың жартысы жапа-тармағай, "О, ұлыңның бауы берік болсын!" деп құттықтай кетеді. Жақсы сөз бен ақ ниеттің аласы жоқ. Бірақ, осындай кезде өзімнен өзім қуыстанамын. Тау басында жүргенімде дүниеге келген "жылқышы" - қыз бала, "қойшы" - ұл бала секілді еді. Мына жақта бәрі басқаша ма?. Таудан түскен мен ғана осы?
Руслан Ербота
Facebook-тегі парақшасынан
