Зиялылардың 90 пайызының бала-шағасы мен немере-шөбересі үйінде орысша сөйлеседі..

Алаш қайраткерлері татар қыздарын керемет текті болған соң алған жоқ. 20 ғасырдың басында қазақтың оқыған қыздары өте аз болды ғой. Семейде татар көпестері көп тұратын. Сол заманның ел көрген, жер көрген ең көзі ашық адамдары - осы көпестер болатын. Алаш қайраткерлерінің татар қыздарына үйленгені де содан. «Қазақтың бір жігіті оқу бітірді дегенше, татардың бір қызы тұрмысқа шықты десеңші» деген сөз тарапты сол кезде Семейде. Семейде әлі күнге дейін бір көшенің бір бетін Таткрай деп, енді бір жағын Казкрай деп атайды. Алматыда ұйғырлар мен дұңғандар, Шымкент жақта өзбектер қалай көп болса, Семейде да тура солай татар көп. Татар (көпестің) қыздары светский ортаға жақын жүргендіктен бекзаттау, сылқымдау болып келетін. Орысша білді. Әйтпесе, олардың қазақтан түк айырмашылығы жоқ. Егер сол кезде қазақтың оқыған-тоқыған қыздары көп болғанда, жігіттеріміз соларға үйленетін еді. Біздің бір қасіретіміз – ана тілімізден ерте айырылып, қазақ бекзадаларының тәрбиесінен мақұрым қалып, кейінгі зиялыларымыз орыстанып кетті ғой. Ұлтым деп жүрген біз білетін зиялылардың 90 пайызының бала-шағасы мен немере-шөбересі үйінде орысша сөйлеседі..

Жолымбет Мәкіш
Фейсбуктегі парақшасынан