Біздің жігіттер мықтылар тізімінде

Бұл күндері Құрлықтық хоккей лигасының (ҚХЛ) тұрақты біріншілі­гінің қорытындысы бойынша жа­рыс кестесінде алғашқы 16-орынды иеленген командалар Гагарин кубогы үшін таласуда.
Өкінішке қарай, биылғы маусымда Астананың «Барыс» клубы көздеген мақсатына қол жеткізе алмай, қалың топтың арасында қалып қойды.
Десек те, тұрақты біріншілік бары­сын­­да өрелі өнерімен көзге түскен аста­налық коман­даның кейбір ойыншылары кейбір аталымдар бойынша теңдессіз деп таныл­ған екен. Мысалы, Роман Старчен­ко мен Майк Ландин бір-бір реттен «ап­та­ның үздік қор­ғаушысы» атанса, «апта­ның үздік шабуыл­шылары» тізімінен Найджел Доус (2 рет) пен Брэндон Бо­­чен­скидің есімдерін кезік­тірдік. Қазан айында Доусқа тең келер ша­буыл­шы та­былмаса, желтоқсандағы ең мықты қор­ғаушылар тізімін Кевин Даллмэн баста­ды.
32 рет нысананы дәл көздеген Магни­тогорскінің «Метталург» клубының ойын­шысы Сергей Мозякин сұрмер­гендер кө­шін бастаса, одан бір гол кем соққан біздің Найджел Доус екінші орында тұр. Пас беру жағынан Санкт-Петербордың СКА клубы­ның беткеұс­тары Вадим Шипачев (43 пас) шашасына шаң жұқтырмаса, ЦСКА-ның ойыншысы Александр Радулов (42 пас) екінші саты­да. Үшінші орында – Брэндон Бо­ченски (41пас) екінші сатыға жайғасты.
Ал «гол+пас» аталымы бойынша 61 ұпай жиған Боченскиге (20 гол+41пас) үшінші орын бұйырған екен. Ал бірінші және екінші орындарды Сергей Мозякин (32+35) мен Александр Радулов (23+42) олжалады. Сондай-ақ голды да жиі со­ғып, оңтайлы да пас бере білетін қор­ғау­шылардың бірі ретінде Кевин Даллмэннің де (8+32) есімі жиі аталады.
Тағы бір қызықты статистикалық мәлі­мет. Дөрекілік танытып немесе басқа да оғаш әрекетері үшін мұз айдынына жиі қуылғандардың қатарында Дамир Рыс­баев та бар. 20 жастағы қазақтың жуан жұды­рықты жігітінен бұл күндері ҚХЛ-дағы барлық тафгайлар қаймығады десек, артық айтқанымыз емес. Дамирдің айып уақыты – 111 минут. Бұзақылар тізімінде қандасы­мыз үшінші орында тұр. Дамирге қарағанда «Витязьдің» есерсоғы Игорь Головков (122 минут) пен «Медвешчак­тың» мықтысы Блэйк Парлетт ережені көбірек бұзатын көрінеді. 

Ғалым СҮЛЕЙМЕН

aikyn.kz/ru/articles/show/20864-b_zd_zh_g_tter_my_tylar_t_z_m_nde