«1000 ән» мың тапсырманың бірі боп қалмай ма?
Биыл мәдениет саласында біраз жаңа жобалар қолға алынып, серпіліс туған сияқты еді. 
Соның бірі «Қазақтың дәстүрлі 1000 әні мен 1000 күйі» не боп жатыр екен? Ол жайлы неге еш жерде ештеңе айтылмайды?
Ақмарал Бекболатқызы, Шымкент қаласы
«Қазақтың дәстүрлі 1000 әні және 1000 күйі» жобасымен бүгінде «Ел» шығармашылық бірлестігі айналысып жатыр. Аталған жоба бойынша мамандар іске кірісіп те кетті. Қазақтың дәстүрлі әнін орындаушы және қазақ музыкасын жақсы түсініп, дәріптеуге қызмет етіп жүрген мамандардан көркемдік кеңес құралған. Солар ең әуелі халық әндерін, содан соң Ақан сері, Біржан сал, Әсет, Мұхит, т.б халық арасынан шыққан композиторлардың туындыларын түгендеуден бастап, күні бүгінге дейінгі қазақтың белгілі және белгісіз қалған әндерін жинақтау үстінде.
Жалпы, жүйе бойынша халық әндері – бір бөлек, халық композиторларының әндері, содан соң қазақтың беташар, сыңсу, бесік жыры сынды ғұрыптық әндері іріктелуде. Осы орайда ең басты дерек көзі, материал қоры Мемлекеттік кино және фото, дыбыстық жазбалар мұрағаты мен Қазақ радиосының «Алтын қоры» болып отырған жайы бар. Мамандар дәстүрлі әннің өзі бас-аяғын жинақтағанда 40-тан астам таспа болуы мүмкін екендігін айтуда. Бұл еңбектің пайдасы сол – кешегіден қалған Әміре, Ғарифолла, Жүсіпбек, Манарбек ағаларымыз бен Рахия Қойшыбаева, Жамал Омарова сияқты қайталанбас ерекшелігімен қымбат дауыстар бүгінгі күнгі нағыз тыңдарманымен қауышады.
