Әлемнің ең ұзын спортшысы кім?
Сағадат Нұрмағамбетов атындағы халықаралық дәстүрлі бокс турнирінен екі метрден асатын боксшы көрдім. Бойына қарап, «әлемнің ең ұзын спортшысы осы ма екен?» деген ойда қалдым. Мен шатасқан жоқпын ба?
Әлішер Жантілеуов, Алматы қаласы
Сіздің көрген боксшыңыздың ұлты – тәжік. Жасы 16-да, бойы – 216 сантиметр. Ал есімі Мирожиддин Каримов. Дегенмен әлемде одан да ұзын спортшылар бар. Мәселен, Ресейдің «Химки» баскетбол клубында өнер көрсететін Денис Ершовтың бойы – 220 сантиметр. Ал әлемнің ең бойшаң спортшысы деп танылған қытайлық Яо Миннің бойы 2 метр 29 сантиметрге жетеді. Бүгінде ұлттық баскетбол лигасының «Хьюстон Рокетс» командасының намысын қорғайтын оның бойы 10 жасында-ақ 165 сантиметр болыпты. Жалпы, Яо Минді «алыптар отбасынан шыққан» десек те болады. Өйткені Яоның әкесінің бойы – 202 сантиметр, ал шешесінің бойы 2 метрге 10-ақ сантиметр жетпейді.
