Алғашқы білім ошағы қазақ жерінде қашан ашылған?
Қазақтың көшпенді өмір сүргені белгілі. Алайда орта ғасырларда өмір сүрген, аты әлемге тараған оқымыстылар болғанын тарихтан білеміз.
Осы орайда менің білгім келгені, қазақ жерінде алғашқы мектеп қашан ашылған және онда сабақ қай тілде оқытылған?
Еркебек Болатбеков, Семей қаласы
Тарихи деректерге қарағанда, қазақ жерінде алғашқа діни білім беретін мектеп-медреселер, орта білім мекемелері VІІ-VІІІ ғасырларда жұмыс істеген. Халық отырықшы өмір сүрген Исфиджаб, Тараз, Сайрам, Түркістан, Отырар және басқа қалаларда 84 медресе болған екен. Бұл медреселерде бес мыңға жуық бала тәлім алған. Ал ауылдық жерлерде де молдалар сабақ жүргізетін кішігірім медреселер болғаны айтылады. Сабақ күз, қыс айларында оқытылған көрінеді. Жасы жеті жастан жоғары балалар медресеге қабылданған. Сабақ араб тілінде жүргізіліп, Құран аяттары оқытылыпты. Қала медреселері Қазы, Сопы, Діни қызметкерлер мен ауыл медреселерінде білім беретін молдаларды даярлаған деседі. Орта ғасырда Отырардағы осындай медресенің бірінде Әбу Насыр әл-Фараби білім алған.
