Алматыдағы Тәуелсіздік монументі АҚШ-та да бар
Еліміздің оңтүстік астанасы Алматыда орналасқан Тәуелсіздік монументіне ұқсас ескерткіш АҚШ астанасы Вашингтонда да бар деп естідім. Осы туралы толығырақ айтсаңыздар екен.
Бақытбек Ахметбеков, Өскемен қаласы
Иә, Вашингтон қаласындағы бұл ескерткіш Қазақстанның АҚШ-тағы елшілігі ғимаратының алдында бой көтерген. 2006 жылы күзде Елбасының қатысуымен ашылған ескерткіш Алматыдағы Республика алаңында тұрған Тәуелсіздік монументінің шағын үлгісі негізінде жасалған. Мұнда да археологиялық қазба жұмыстары кезінде табылған екі жарым мың жылдық тарихы бар сақ жауынгерінің тұлғасы сомдалған. Ал еліміздегі халықтар бейбітшілігі жауынгердің қолындағы қыран құс ретінде бейнеленіпті. Ашылғанына көп бола қоймаған бұл монумент бүгінде Америка мен Қазақстанның достығы мен берік сенімінің символына айналды.
