Асқазандағы жарадан құтылу үшін не істеу керек?
Менің асқазаным бұрыннан ауырады. Емдетпеген жерім жоқ. Алайда нәтиже шығар емес. Енді менің ұлымның да асқазанына ойық жара пайда болыпты. Жалпы бұл ауру тұқым қуалай ма? Одан толық жазылу үшін не істеу керек?
Марат, Атырау облысы
Дәрігер мамандардың айтуынша, адам бұл ауруға шалдыққан кезінде көңіл-күйі болмай, тамаққа тәбеті нашарлайды екен. Көп жағдайда бұл ауру жүйке және гормоналдық реттеу механизмі мен асқазанда ас қорыту жүйесінің бұзылуынан болатын көрінеді. «Негізінен асқазан жарасы өз кілегей қабығын тиісінше қорыта алмаудан туады. Бұл ауру 50 жастың шамасындағы ер азаматтарда көп байқалады. Ал жара неден пайда болады дегенге келсек, ол көп жағдайда стресс, бастың мазасызданып ауруы, тамақ ішуді жүйелі сақтамау немесе тамақтың құнарлы болмауы, не сапасыз ішілген дәрінің зияндылығынан туындайды»,- дейді дәрігерлер. Сондай-ақ, шылым шегу мен арақ-шарап ішудің соңы да асқазан ауруына әкеліп соқтырады екен. Онымен қоса, бұл ауруға тұқым қуалаушылықтың да әсері бар. Аурудың қабынуы көктем, күз айларында келеді. Егер асқазанда ауырғандық пайда болған жағдайда және құсу мазалағанда өз еркімен емделмей, уақытында дәрігерге қаралып, солардың ғана кеңесіне жүгініп, ем қабылдаса аурудан толық айығуға болады. Егер олай етпеген жағдайда жара асқынып, қан кету, тесілу, қатерлі ісік ауруына айналуы мүмкін.
