Автокөлікті қалай тіркеуден шығаруға болады?
–Менің ескі көлігім сынып, бұрыннан бері жүрмей тұр. Бірақ есептен алынбаған. Тіпті оның техпаспорты, мемлекеттік нөмірі де жоқ. Енді оны тіркеуден қалай шығарамын? Салық төлей бергенше есептен алып тастасам ба деп едім.
Мұратбек, Теміртау қаласы
Жол полициясы тіркеу-емтихан бөлімі қызметкерлерінің айтуынша, мұндай жағдайда сіз ең бірінші көлікті Жол полициясы органдарына барып есептен шығаруыңыз керек екен. Көлік құралдарының жекелеген түрлерін мемлекеттік тіркеу және есепке алу ережесінің 68 тармағына сәйкес, егер жойылуға, есептен шығаруға жататын көлiк болса, онда жол полициясы органына мынадай құжаттар өткізуіңіз қажет: 1.Көлік құралын тіркеу бланкісінде толтырылған өтініш; 2.Заңды тұлғаның көлік құралын тіркеу бланкісінде толтырған өтініші ұйымның мөрiмен расталады; 3.Тiркеу әрекеттерін жасауға өтініш білдірген адамның жеке басын куәландыратын құжат, жеке куәлігінде тұрғылықты жерінің мекен-жайы болмаған жағдайда, сондай-ақ тұрақты тұратын жерінде тіркелгенін растайтын құжатты (Азаматтарды тіркеу кітабы не мекен-жай бюросынан анықтама); 4.ҚР «Салықтар және бюджетке төленетін басқа да міндетті төлемдер туралы» кодексінде белгіленген баждар мен алымдарды төлеу туралы құжаттар; 5.Мыналарды: салық төлеушілер үшін – Салық кодексінде белгіленген тәртіппен көлік құралдарына салықтың төленгенін; ҚР Салық кодексіне сәйкес салық төлеушілер болып табылмайтын тұлғалар үшін – салық төлеуден босату құқығын растайтын құжаттарды; 6.Шаруашылық жүргізуші субъектіні тіркеу туралы куәлік немесе заңды тұлғаның тіркелгенін растайтын өзге құжат; 7.Көлiк құралының тiркеу құжаты ұсынылған жағдайда байқау жүргiзiлмей, есептен шығарылады.
